سنڌ سرڪار ايندڙ هفتي کان ڪراچي ۾ ڊبل ڊيڪر بسون ۽ اي وي بسون هلائڻ جو فيصلو ڪري ڇڏيو

سنڌ سرڪار ايندڙ هفتي کان ڪراچي ۾ ڊبل ڊيڪر بسون ۽ اي وي بسون هلائڻ جو فيصلو ڪري ڇڏيو، جڏهن ته وڌيڪ ٽن ضلعن ۾ پيپلز بس سروس جا نوان روڊ شروع ڪرڻ جو اعلان ڪيو ويو آهي. ڪراچي ۾ سينيئر صوبائي وزير شرجيل انعام ميمڻ جي صدارت هيٺ اعليٰ سطحي اجلاس ٿيو. اجلاس ۾سيڪريٽري ٽرانسپورٽ اسد ضامن، ايم ڊي، ايس ايم ٽي اي ڪنول نظام ڀٽو ۽ ٻين شرڪت ڪئي. اجلاس ۾ سينيئر صوبائي وزير شرجيل انعام ميمڻ کي ييلو لائن بي آر ٽي ۽ ريڊ لائن بي آر ٽي جي ترقياتي ڪمن بابت بريفنگ ڏني وئي. سينيئر صوبائي وزير شرجيل ميمڻ کي ڪراچي ۾ اي وي ٽيڪسي سروس شروع ڪرڻ ۽ پنڪ اسڪوٽيز جي ٻئي مرحلي تي بريفنگ ڏني وئي. ان موقعي تي سينيئر صوبائي وزير شرجيل ميمڻ چيو ته اميد آهي ته ڊبل ڊيڪر بسون ۽ نيون اي وي بسون ايندڙ هفتي تائين ڪراچي ۾ پهچي وينديون. هن چيو ته ڪراچي جي عوام لاءِ ڊبل ڊيڪر جو روٽ شروع ڪرڻ سان گڏ اي وي بسن جا نوان روٽ شروع ڪيون پيون وڃن. سندس چوڻ هو ته سنڌ سرڪار ڊسمبر مهيني تائين اي وي ٽيڪسي شروع ڪرڻ ۽ هلندڙ مالي سال ۾ وڌيڪ پنج سئون بسون آڻڻ جو ارادو رکي ٿي. سينيئر صوبائي وزير شرجيل انعام ميمڻ چيو ته سنڌ جي ٻين ضلعن ۾ به تمام جلد پيپلز بس سروس شروع جا نوان روڊ به شروع ڪيا پيا وڃن. هن چيو ته نون روٽن لاءِ آپريشنل تياريون مڪمل ڪيون وڃن. سينيئر صوبائي وزير شرجيل ميمڻ چيو ته سمورن ڊويزنل هيڊ ڪوارٽرن ۾ عورتن ۽ شاگردياڻين کي اسڪوٽيز هلائڻ جي تربيت جو سلسلو به شروع ڪيو ويو آهي.