لاڙڪاڻي واسي نوجوان کي ڌاڙيلن اغوا ڪري سندس بازيابيءَ لاءِ وارثن کي فون ڪري 30 لک رپيا گهريا آهن جڏهن ته نوجوان کي ڄنگهن ۾ گوليون هڻي زخمي ڪرڻ جي وڊيو سوشل ميڊيا تي وائرل ڪئي وئي آهي.
مراد واهڻ واسي نوجوان وقار کچي ڌاڙيلن هٿان اغوا ٿي ويو آهي جنهن جي آزاديءَ لاءِ ڌاڙيلن وارثن کي فون ڪري 30 لک رپيا گهريا آهن.
مغوي نوجوان جي وارثن دانهيندي چيو ته سندن ڪنهن سان دشمني ناهي بيگناهه نوجوان کي اغوا ڪري شڪارپور جي ڪچي ۾ باندي بڻايو ويو آهي.
هنن چيو ته ڌاڙيلن فون ڪري نوجوان جي بازيابيءَ لاءِ 30 لک رپيا گهريا آهن، هو غريب مسڪين ماڻهو آهن اڄ به ماني ناهي ڪئي ۽ گهر ۾ قرآن پاڪ لوڏي رهيا آهن.
وارثن اعليٰ اختيارين کان مطالبو ڪيو ته وقار کي جلد آزاد ڪرائي بيچيني ختم ڪئي وڃي.
ڌاڙيلن مغوي نوجوان کي ڄنگهن ۾ گوليون هڻي زخمي ڪرڻ واري وڊيو سوشل ميڊيا تي وائرل ڪري ڇڏي.
وڊيو ۾ مغوي نوجوان ٻڌائي رهيو آهي ته ڌاڙيلن کيس مراد واهڻ مان اغوا ڪري ڪچي ۾ آڻي ڄنگهن ۾ گوليون هڻي زخمي ڪري ڇڏيو آهي.
وڊيو ۾ نوجوان چئي رهيو آهي ته ڌاڙيل کيس ماري لاش روڊ تي اڇلائي ڇڏيندا، هو ايس ايس پي لاڙڪاڻي، پنهنجي والد طالب کچي ۽ ٻين کي اپيل ٿو ڪري 30 لک رپيا ڌاڙيلن کي آزاد ڪرايو وڃي.
