- Advertisement -
مصر جي صدر عبدالفتاح السيسيءَ امريڪي صدر ڊونلڊ ٽرمپ جي فلسطينين کي غزه مان بي دخل ڪرڻ بابت بيان کي غير منصفاڻو قدم قرار ڏيندي چيو آهي ته سندس حڪومت ان ۾ شامل نه ٿيندي.
العربيه ٽي وي جي رپورٽ موجب، مصر جي صدر عبدالفتاح السيسي قاهره ۾ دوري تي آيل ڪينيا جي صدر وليم روٽو سان گڏ پريس ڪانفرنس ڪندي چيو ته مصر ٻه رياستي حل جي بنياد تي اسرائيل ۽ فلسطين وچ ۾ امن معاهدي جي لاءِ امريڪا جي نئين انتظاميا سان گڏجي ڪم ڪندا.
هن چيو ته فلسطينين جي بي دخلي جي حوالي سان جيڪو چيو پيو وڃي ان کي برداشت نٿو ڪري سگھجي ۽ نه ئي اجازت ڏئي سگھجي ٿي ڇاڪاڻ ته ان سان مصر جي قومي سلامتي تي اثر پوندا.
مصري صدر چيو ته فلسطينين کي بيدخلي ۽ ٻاهر منتقل ڪرڻ هڪ غيرمنصفاڻو قدم آهي جنهن ۾ سندن حڪومت شريڪ نه ٿيندي.
عبدالفتاح السيسي چيو ته جيڪڏهن ٽرمپ جي تجويز تي مصر جي عوام سان اها ڳالهه ڪئي به وڃي ته هو فلسطينين جي حمايت ۾ روڊن تي نڪري ايندا.
هن وڌيڪ چيو ته 2 رياستي حل تاريخي حق آهي ۽ صدر ٽرمپ اهو هدف حاصل ڪرڻ جي اهليت رکي ٿو، ان سان وچ اوڀر ۾ مستقل پائيدار امن قائم ٿيندو.- Advertisement -
