نئين ديري ۾ واپاري سنتوش ڪمار جي قتل خلاف شٽربند هڙتال

نئين ديري ۾ 27 ڏينهن اڳ قتل ٿيل واپاري سنتوش ڪمار جا قاتل گرفتار نه ٿيڻ خلاف شٽر بند هڙتال ڪئي وئي. شهري ايڪشن ڪاميٽي جي سڏ تي شهر جي سياسي، سماجي، مذهبي، واپاري تنظيمن پاران سمورو شهر بند رکي شٽر بند هڙتال ڪئي وئي. هڙتال سبب شهر جا الله وارو چوڪ، پنج گلي چوڪ، صدر چوڪ، اسٽيشن روڊ، لاڙڪاڻو روڊ، شاهي بازار، ريشم بازار، صرافه بازار، ڪريانه، جنرل اسٽورز، موبائل مارڪيٽ ۽ ٻيا سمورا ننڍا وڏا ڪاروباري مرڪز بند رکيا ويا. اڳواڻن جو چوڻ هو ته شهر ۾ ڏوهارين سرعام واپاري سنتوش ڪمار کي قتل ڪري دهشت ڦهلائي پر افسوس جو قاتلن جي گرفتارين جون فقط خاطريون ڪرايون ويون، پر 27 ڏينهن گذرڻ باوجود قاتل گرفتار نه ٿي سگهيا آهن. هنن چيو ته آءِ جي توڙي سنڌ حڪومت جي نوٽيس وٺڻ باوجود پوليس جي ڪارڪردگي زيرو تي بيٺل آهي ۽ ايف آءِ آر داخل ڪرڻ کانپوءِ ڪو به جوابدار گرفتار ناهي ٿي سگهيو. شهرين مطالبو ڪيو ته سنتوش ڪمار جي قتل ۾ ملوث جوابدار گرفتار ڪري مقتول جي وارثن سان انصاف ڪيو وڃي.