نگران وزيراعظم جي نالي تي وزيراعظم شهباز شريف ۽ مخالف ڌر اڳواڻ راجا رياض اڄ ٻيهر مشاورت ڪندا.
وزيراعظم شهباز شريف مخالف ڌر اڳواڻ راجا رياض کي خط لکي مشاورت جي دعوت ڏني هئي جنهن کانپوءِ هو وزيراعظم سان ملڻ لاءِ پهتو، ٻنهي هڪٻئي آڏو ٽي ٽي نالا رکيا ۽ مشاورت ڪئي.
پاڪستان پيپلز پارٽي نگران وزيراعظم لاءِ اڳوڻي پرڏيهي سيڪريٽري جليل عباس جيلاني ۽ اڳوڻي چيف جسٽس آف پاڪستان تصدق حسين جيلاني جا نالا تجويز ڪيا آهن جڏهن ته ٻين نالن ۾ صادق سنجراڻي، حفيظ شيخ، ميان محمد سومرو، فواد حسن فواد شامل آهن.
اسيمبلي ٽوڙڻ کانپوءِ نگران وزيراعظم جي نالي کي حتمي شڪل ڏيڻ لاءِ 3 ڏينهن جو وقت آهي، جيڪڏهن ٽن ڏينهن ۾ نالو فائنل نه ٿيو ته معاملو پارلياماني ڪميٽي ڏانهن ويندو.
واضح رهي ته وزيراعظم شهباز شريف نگران وزيراعظم جي معاملي تي مشاورت لاءِ لنڊن ۾ ن ليگ قائد نواز شريف سان به رابطو ڪيو آهي.
شهباز شريف، نواز شريف کي ٽيلفونڪ رابطي ۾ قائد ن ليگ کي نگران وزيراعظم جي معاملي تي مخالف ڌر اڳواڻ سان ٿيل مشاورت تي بريفنگ ڏني.
