وچ اوڀر جي تازي ڇڪتاڻ واري صورتحال تي سلامتي ڪائونسل جو هنگامي اجلاس

وچ اوڀر ۾ ڇڪتاڻ واري صورتحال تي گڏيل قومن جي سلامتي ڪائونسل جو هنگامي اجلاس ٿيو جنهن ۾ چين، روس ۽ الجزائر حماس اڳواڻ اسماعيل هنيه جي قتل جي مذمت ڪئي. حماس اڳواڻ اسماعيل هنيه جي شهادت کانپوءِ ايران جي درخواست تي سلامتي ڪائونسل جو هنگامي اجلاس سڏايو ويو. اجلاس ۾ وچ اوڀر ۾ ڇڪتاڻ روڪڻ لاءِ سفارتي ڪوششون تيز ڪرڻ تي زور ڏنو ويو. ايراني سفير عامر سعيد چيو ته تهران هميشه صبر جو مظاهرو ڪيو آهي پر جواب ڏيڻ جو حق آهي، سلامتي ڪائونسل کي اسرائيلي حملي جي مذمت ڪرڻ گهرجي ۽ ان تي پابنديون لڳائڻ گهرجن. ان تي نائب اسرائيلي سفير جونٿن ملر چيو ته سلامتي ڪائونسل ايران تي علائقائي دهشتگردي جي حمايت ڪرڻ تي پابنديون لڳايون، اسرائيل پنهنجي دفاع جو حق رکي ٿو، نقصان ڪندڙن کي طاقت سان جواب ڏيندو. ان موقعي تي چيني سفير فو ڪانگ چيو ته غزه ۾ جنگبندي جي ناڪامي خطي ۾ ڇڪتاڻ جو سبب آهي. سلامتي ڪائونسل ۾ برطانوي سفير باربرا ووڊورڊ چيو آهي ته اسرائيل ۽ فلسطين کي امن لاءِ نئين سر ڪوششون ڪرڻ گهرجن. آمريڪي نائب سفير رابرٽ ووڊ چيو آهي ته اثر رسوخ رکندڙ ملڪ ايران تي ڇڪتاڻ گهٽائڻ لاءِ دٻاءُ وجهن، جڏهن ته نائب جاپاني سفير چيو ته وچ اوڀر جنگ جي ڪناري تي پهچي چڪو آهي.