وڏي وزير پاران ميرپورخاص ۾ اربين رپيا ماليت واري زمين جا کاتا تبديل ڪرڻ واري معاملي نوٽيس

سنڌ جي وڏي وزير، ميرپورخاص ۾ اربين رپيا ماليت واري زمين جا کاتا تبديل ڪرڻ واري معاملي جو نوٽيس وٺندي ٻن ڪمشنرن ۽ بورڊ آف روينيو تي ٻڌل ڪميٽي قائم ڪري فراڊ ۾ ملوث آفيسرن جو پتو لڳائڻ جو حڪم ڏئي ڇڏيو. وڏي وزير مراد علي شاھ ميرپورخاص جي تعلقي حسين بخش مري ۾ پي سي بي گرائونڊ ويجھو اربين رپيا ماليت جي 22 ايڪڙ زمين، ملاح ڪالوني ۾ 5 ايڪڙ زمين، اقبال ٽائون ۾ سرڪاري 6 ايڪڙ زمين، سبزي منڊي جي سرڪاري دڪانن، ڪولڊ اسٽوريج کي فراڊ ذريعي وڪرو ڪرڻ ۽ کاتا مٽائڻ واري معاملي جو نوٽيس ورتو. ان سلسلي ۾ ڪمشنر شھيد بينظير آباد، ڪمشنر ميرپورخاص ۽ بورڊ آف روينيو جي جڊيشل ميمبر تي ٻڌل ٽه رڪني ڪميٽي جوڙي وئي آھي. ڪميٽي کي 15 ڏينھن اندر معاملي جي جاچ مڪمل ڪري فراڊ ۾ ملوث ماڻھن جو پتو لڳائڻ جو حڪم جاري ڪيو ويو. ان ڏس ۾ ڪمشنر ميرپورخاص، ڊپٽي ڪمشنر ميرپورخاص، ايڊيشنل ڊپٽي ڪمشنر، اسسٽنٽ ڪمشنر تعلقا حسين بخش ۽ مختيارڪار تعلقا حسين بخش سان گڏجاڻي ڪئي. ڪمشنر ميرپورخاص فيصل احمد عقيلي ميڊيا سان ڳالھائيندي چيو تھ ان ڏس ۾ ڪميٽي جي چيئرمين ڪمشنر شھيد بينظير آباد وٽ گڏجاڻي ڪوٺائي وئي آھي، جنھن ۾ لاڳاپيل عملدارن کي رڪارڊ سميت پيش ٿيڻ جو حڪم ڏنو ويو آھي.