پيپلزپارٽي سنڌ، سڀاڻي شهيد راڻي محترمه بينظير ڀٽو جي 71هين سالگره جون تقريبون صوبي جي سمورن ضلعي هيڊ ڪوارٽرن ۾ ڪوٺائڻ جو اعلان ڪري ڇڏيو

پيپلزپارٽي سنڌ، سڀاڻي شهيد راڻي محترمه بينظير ڀٽو جي 71هين سالگره جون تقريبون صوبي جي سمورن ضلعي هيڊ ڪوارٽرن ۾ ڪوٺائڻ جو اعلان ڪري ڇڏيو، پ پ سنڌ جي صدر نثار کهڙي جو چوڻ آهي ته سالگره جو ڪراچي ڊويزن سطح جو جلسو لياري ۾ ٿيندو، پ پ چيئرمين بلاول ڀٽو زرداري جلسي کي خطاب ڪندو. جاري ڪيل بيان ۾ نثار کهڙي چيو ته پيپلزپارٽي سڀاڻي شهيد راڻي محترمه بينظير ڀٽو جي سالگرهه سنڌ جي هر ضلعي ۾ ملهائيندي. سندس چوڻ هو ته سالگره جو ڪراچي ڊويزن سطح جو جلسو سڀاڻي لياري جي علائقي چاڪيواڙه ۾ ٿيندو، پ پ ضلعي صدر، ٻيا عهديدار ۽ پارٽي ڪارڪن پنهنجن پنهنجن ضلعن ۾ شهيد راڻي بينظير ڀٽو جي سالگره جون تقريبون ڪوٺائيندا. پ پ سنڌ جي صدر نثار کهڙي چيو ته اڳوڻي وزيراعظم بينظير ڀٽو جي سالگره تقريبن ۾ ڪيڪ ڪاٽيا ويندا ۽ شهيد راڻي کي جمهوريت، ملڪ ۽ عوام لاءِ ڏنل قرباني کي ڀرپور ڀيٽا پيش ڪئي ويندي. هن چيو ته هر ضلعي ۾ ٿيندڙ سالگرهه تقريب ۾ ضلعي، تعلقي، يوسيز، وارڊ سطح جا سمورا پارٽي عهديدار ۽ مڪاني نمائندا شرڪت ڪندا، ملڪ ۾ جمهوريت شهيد راڻي جي قربانين سان قائم آهي. پ پ سنڌ جي صدر چيو ته شهيد بينظير ڀٽو آئين، پارليامينٽ جي بالادستي ۽ عوام جي حق حاڪميت لاءِ جدوجهد ڪئي، پيپلزپارٽي چيئرمين بلاول ڀٽو زرداري جي قيادت ۾ شهيد بي بي جي ويزن تحت اڳتي وڌي رهي آهي. نثار کهڙي چيو ته پارليامينٽ کي بااختيار بڻائڻ، ارڙهين ترميم، صوبائي خودمختاري ۽ صوبن کي مالي مستحڪم بڻائڻ جو ڪريڊٽ صدر آصف علي زرداري ڏانهن وڃي ٿو.