ڪراچي سميت سنڌ جي مختلف يونيورسٽين ۽ ڪاليجن ۾ داخل لاءِ ايم ڊي ڪيٽ ٽيسٽ سڀاڻي ورتي ويندي

ميڊيڪل ۽ ڊينٽل ڪاليجن ۾ داخلا لاءِ انٽري ٽيسٽ سڀاڻي ورتي ويندي، تياريون مڪمل ڪيون ويون آهن. ايم ڊي ڪيٽ 2024 جي ٽيسٽ ڪراچي، حيدرآباد، ڄامشورو، شهيد بينظير آباد، لاڙڪاڻي ۽ سکر ۾ رٿيل آهي. ڪراچيءَ ۾ ٻن هنڌن تي ايم ڊي ڪيٽ ٽيسٽ ورتي ويندي، 6 هزار 400 اميدوار اين ايِ ڊي يونيورسٽيءَ ۾ ايم ڊي ڪيٽ ٽيسٽ  ڏيندا، جڏهن ته ڪراچي يونيورسٽي ۾ 6 هزار 449 اميدوارن کان ٽيسٽ ورتي ويندي. حيدرآباد ۾ 6 هزار 406 اميدوار پبلڪ اسڪول لطيف آباد ۾ انٽري ٽيسٽ ڏيندا، جڏهن ته مهراڻ يونيورسٽي آف انجنيئرنگ اينڊ ٽيڪنالاجي ڄامشورو ۾ 6 هزار 254 اميدوار پنهنجي قسمت آزمائيندا. شهيد بينظير آباد ۾ 27 سئو 86 اميدوارن کان انٽري ٽيسٽ قائد عوام يونيورسٽي ۾ ورتي ويندي، جڏهن ته لاڙڪاڻي ۾ 4 هزار 802 ميڊيڪل جا شاگرد پوليس ٽريننگ اسڪول لاڙڪاڻي ۾ ايم ڊي ڪيٽ ٽيسٽ ڏيندا. سکر ڊويزن سان تعلق رکندڙ 5 هزار 586 اميدوارن کان ايم ڊي ڪيٽ ٽيسٽ آءِ بي ايَ پبلڪ اسڪول ۾ ورتي ويندي.