سنڌ جي مختلف شهرن ۾ عيد ميلاد النبي صلعم جي سلسلي ۾ تقريبون ڪوٺائڻ ۽ ريليون ڪڍڻ جو سلسلو جاري آهي.
باڊهه ۾ گورنمينٽ گرلس ڊگري ڪاليج ۾ عيد ميلاد النبي صلعم جي سلسلي ۾ تقريب ڪوٺائي وئي.
تقريب ۾ ڪاليج جي پرنسپال ميڊم صدوران سولنگي، رتيديري ڪاليج جي پرنسپال رضيه سومرو، شاگردياڻين ۽ ڪاليج اسٽاف شرڪت ڪئي.
تقريب جي آخر ۾ ملڪ توڙي قوم جي سلامتي، خوشحالي ۽ امن امان لاءِ دعائون گهريون ويون.
ٺڪراٺي ۾ سڪندري علماءَ ۽ حر جماعت طرفان عيد ميلاد النبي صلعم جي سلسلي ۾ مولوي نياز احمد سڪندري، حافظ اشفاق احمد، شاهد حسين قادري ۽ ٻين جي اڳواڻيءَ ۾ ريلي ڪڍي وئي.
ماڻهن هٿن ۾ ساوا جهنڊا کڻي موٽرسائيڪلن، ڪارن ۽ ٽريڪٽر ٽرالين ۾ چڙهي ريلي ۾شرڪت ڪري سرڪار جي آمد مرحبا، آقا جي آمد مرحبا جا نعرا هنيا.
ريلي جامعه راشد المدرسا کان ڳوٺ حرمجاهد ڀائي خان مهر پهتي جتي عالمن سڳورن نبي ڪريم صلعم جو شان بيان ڪيو ۽ نعت خوانن نعتون پڙهيون.
ڏوڪري ۾ پاڪستان ايڪس سروس مين سوسائٽي طرفان عيد ميلاد النبي صلعم جي سلسلي ۾ طاهر حسين خاصخيلي، امير علي جوڻيجو ۽ ٻين جي اڳواڻيءَ ۾ ريلي ڪڍي وئي.
