- Advertisement -
بنگلاديش ۾ ڪوٽا سسٽم خلاف شاگردن جي سول نافرماني واري تحريڪ جي اعلان کانپوءِ پرتشدد مظاهرن ۾ مارجي ويلن جو انگ 300 تائين پهچي ويو آهي، 11 هزارن کان وڌيڪ ماڻهن کي گرفتار ڪيو ويو آهي.
ميڊيا رپورٽن موجب سول نافرماني جي تحريڪ هلائيندڙ شاگردن وزيراعظم حسينه واجد جي استعيفيٰ جو مطالبو ڪيو آهي ۽ ڪرفيو باوجود ڍاڪا ڏانهن مارچ جو اعلان ڪيو آهي.
پرڏيهي ميڊيا موجب ڊاڪٽرن ۽ پوليس هن وقت تائين شاگردن جي احتجاج دوران جهڙپ ۾ 300 ماڻهن جي مارجڻ جي تصديق ڪئي آهي.
پوليس ۽ مظاهرين وچ ۾ تازو ڇڪتاڻ پڻ ٿي، جنهن ۾ پوليس ڳوڙها آڻيندڙ گيس ۽ ٻين هٿيارن جو استعمال ڪيو، جنهن ۾ ڪيترائي ماڻهو زخمي ٿي پيا آهن.
رپورٽن مطابق راڄڌاني ڍاڪا ۽ اترين ضلعن ۾ آچر واري ڏينهن ٿيل ڇڪتاڻ ۾ وڌيڪ جاني نقصان ٿيو، جڏهن ته پوليس اهلڪارن جو چوڻ آهي ته سراج گنج واري علائقي ۾ به مظاهرين پوليس تي حملو ڪيو ويو.
ڪوٽا سسٽم خلاف جولاءِ ۾ شروع ٿيندڙ احتجاج ۾ هن وقت تائين پرتشدد واقعن ۾ سوين ماڻهو مارجي چڪا آهن، جڏهن ته شاگرد سول نافرماني جي تحريڪ جو اعلان ڪندي وزيراعظم شيخ حسينه واجد کان استعيفيٰ جو مطالبو ڪري رهيا آهن.
ملڪ جي صورتحال تي بنگلاديش جي وزيراعظم چيو آهي ته جيڪي احتجاج جي نالي تي هي سڀ ڪجهه تباهه ڪري رهيا آهن اهي شاگرد نه آهن، اهي ڏوهاري آهن، عوام انهن سان لوهي هٿن سان منهن ڏي.
ميڊيا رپورٽن مطابق ڍاڪا ۾ ڪرفيو لاڳو ڪيو ويو آهي، موبائيل فون ۽ انٽرنيٽ سروس به بند ڪئي وئي آهي، پوليس ۽ فورسز ڪاررواين ۾ هڪ هفتي دوران 11 هزار ماڻهن کي گرفتار ڪيو ويو آهي….- Advertisement -
