مديجي: اڇي مسجد ڀرسان هٿياربندن جي ايندڙ ويندڙ گاڏين کان ڦرلٽ

مديجي ويجهو هٿياربندن رستي تي رڪاوٽون وجهي ايندڙ ويندڙ مسافر گاڏين کان ڦرلٽ ڪري فرار ٿي ويا. اڇي مسجد ڀرسان سکر -لاڙڪاڻو روڊ تي هٿياربندن سکر کان ايندڙ ڪار سوارن کي روڪي شمس الدين چانڊيو، نثار چانڊيو، نيار کوسو، عبدالڪريم چانڊيو ۽ ٻين کي يرغمال بڻائي موبائيل فون، هزارين روپيا روڪ رقم ۽ ٻيو سامان ڦر ڪرڻ بعد آسانيءَ سان فرار ٿي ويا. متاثرن دانهيندي ٻڌايو ته هنن کان اڳ هٿياربندن مزدا ۽ ٽرڪ کي به روڪي ڊرائيورن کان ڦرلٽ ڪئي، جڏهن ته روڊ تي هڪ به اهلڪار موجود نه هو. متاثرن اعليٰ اختيارين کان مطالبو ڪيو ته ڦر واقعي جو نوٽيس وٺي سامان واپس ڏياريو وڃي، ٻي صورت ۾ سخت احتجاج ڪيو ويندو.