سنڌ جي وڏي وزير سيد مراد علي شاهه سان برطانيه جي نئين ڊپٽي هاءِ ڪمشنر لانس ڊوم جي ملاقات

وڏي وزير مراد علي شاهه سان برطانيا جي نئين ڊپٽي هاءِ ڪمشنر لانس ڊوم ملاقات ڪئي آهي. ملاقات ۾ سنڌ جي وڏي وزير نئين برطانوي ڊپٽي هاءِ ڪمشنر کي سندس حڪومت پاران مڪمل سهڪار جو يقين ڏياريو، ان موقعي تي ڊپٽي هاءِ ڪمشنر وڏي وزير جا سهڪار ڪرڻ تي ٿورا مڃيا. وڏي وزير سيد مراد علي شاهه چيو ته پاڪستان جا برطانوي حڪومت ۽ عوام سان پراڻا مضبوط لاڳاپا آهن. وڏي وزير جي ترجمان موجب ملاقات ۾ 2022 جي ٻوڏ جي تباهي ۽ بحالي تي بحث ڪيو ويو. وڏي وزير مراد علي شاهه چيو ته ٻوڏ کان پوءِ پهريون چئلينج زراعت جي بحالي هو، سنڌ حڪومت زرعي زمين بحال ڪرائي ٻج ۽ ڀاڻ فراهم ڪري ڪڻڪ جي شاندار فصل حاصل ڪئي. سندس چوڻ هو ته عالمي برادري ۽ عالمي بينڪ جي سهڪار سان ٻوڏ متاثرن لاءِ گهرن جي تعمير تيزي سان جاري آهي. هن چيو ته سنڌ جا ماڻهو موسمياتي تبديلين جو سڀ کان وڌيڪ شڪار رهيا آهن. وڏي وزير چيو ته سنڌ حڪومت زرعي ٽيڪس ۾ 35 کان 45 سيڪڙو واڌ ڪئي آهي، پاڻي جي کوٽ، ڀاڻ ۽ ٻين شين جي مهانگي ٿيڻ ڪري زراعت هاڻي منافعو ڏيندڙ پيشو ناهي رهيو. مراد علي شاهه چيو ته سنڌ جي هر شهري سميت اقليتن کي برابري جي بنياد تي حق حاصل آهن، سنڌ کي انتهاپسندي کان پاڪ صوبو هجڻ جو اعزاز حاصل آهي، سنڌ ۾ دهشتگردي ٻاهران آئي.