ڀارت ۾ مسلمانن سميت اقليتن مٿان ظلم ڪيو پيو وڃي: صدر آصف علي زرداري

صدر آصف علي زرداري چيو آهي ته ڀارت ۾ مسلمانن سميت اقليتن مٿان ظلم ڪيو پيو وڃي، والاريل ڪشمير جي آزادي وقت جي ضرورت آهي. گلگت بلتستان جي آزادي جي ڏهاڙي جي تقريب کي خطاب ڪندي صدر آصف علي زرداري چيو ته والاريل ڪشمير جو عوام ڊگهي عرصي کان ڀارت جي ظلم جو شڪار آهي، والاريل ڄمون ڪشمير جي آزادي وقت جي ضرورت آهي، ڀارت ۾ ڪشميرين جي نسل ڪشي انتها تي پهچي چڪي آهي. هن چيو ته دنيا ڄاڻي ٿي ته ڀارت ۾ مسلمانن سان ڪهڙو ورتاءُ ڪيو پيو وڃي، ڪشمير مسئلو گڏيل قومن جي ٺهرائن مطابق حل ٿيڻ گهرجي. سندس چوڻ هو ته سي پيڪ سان خطي ۾ ترقي جا نوان رستا کليا آهن، چين سندن دوست ملڪ آهي، سي پيڪ فيز ٽو ڪاميابي سان پنهنجا مرحلا طئي ڪري رهيو آهي. صدر آصف علي زرداري چيو ته گلگت بلتستان جي عوام جي بهادريءَ کي وساري نٿو سگههي، گلگت بلستان جي عوام آزادي وقت پنهنجي جانين جو نذرانو پيش ڪيو. سندس چوڻ هو ته شهيد ذوالفقار ڀٽو ايف آر سي ختم ڪيو، سندن حڪومت گلگت کي قانون ساز اسيمبلي ڏني، گلگت بلتستان جي هر وادي ۾ اسڪول ۽ پنهنجي ايئر لائن هئڻ گهرجي. صدر آصف علي زرداري چيو ته گلگت بلتستان ۾ قدرتي وسيلا آهن، هتي سياحت کي هٿي ملي سگهي ٿي، اڄ جو زمانو ڪميونيڪيشن جو آهي. ان کان اڳ صدر آصف علي زرداري گلگت بلتستان جي جشن آزادي جي تقريب ۾ شرڪت ڪئي، جتي گورنر ۽ وزيراعليٰ گلگت سندس آجيان ڪئي. گورنر گلگت بلتستان صدر کي روايتي ٽوپي پارائي ۽ آصف علي زرداري پريڊ جو پڻ معائنو ڪيو….