سريلنڪن ٽيم جا خدشا ختم ڪيا، فيلڊ مارشل پاڻ سريلنڪا جي بچاءَ واري وزير سان ڳالهائي مڪمل سڪيورٽي فراهم ڪرڻ جي خاطري ڪرائي: محسن نقوي

وفاقي گهرو وزير محسن نقوي چيو آهي ته سريلنڪن ٽيم جا خدشا ختم ڪيا، فيلڊ مارشل پاڻ سريلنڪا جي بچاءَ واري وزير سان ڳالهائي مڪمل سڪيورٽي فراهم ڪرڻ جي خاطري ڪرائي، افغانستان کان ڪارروائي بابت حڪومتي سطح تي فيصلو ڪيو ويندو، اِهو نٿو ٿي سگهي ته افغانستان مان حملا ٿيندا رهن ۽ هو چپ ويهن. سينيٽ اجلاس کي خطاب ڪندي محسن نقوي چيو ته فيلڊ مارشل عاصم منير پاڪستان ۽ سريلنڪا وچ ۾ ڳالهين جو ڪردار ادا ڪيو، جنهن جي نتيجي ۾ سريلنڪا جي ڪرڪيٽ ٽيم دورو جاري رکڻ جو فيصلو ڪيو. هن چيو ته فيلڊ مارشل پاڻ سريلنڪا جي بچاءَ واري وزير سان ڳالهايو ۽ کيس قائل ڪري مڪمل سڪيورٽي جي خاطري ڪرائي. محسن نقوي چيو ته سريلنڪن ڪرڪيٽ بورڊ رات دير سان اعلان ڪيو ته سندن ٽيم پاڪستان جو دورو معمول موجب جاري رکندي، جنهن سان هڪ امڪاني بحران ٽري ويو. وفاقي گهرو وزير چيو ته سريلنڪن ٽيم بم ڌماڪي بعد واپس وڃڻ جو فيصلو ڪيو هو ته هنن ساڻن ڳالهيون شروع ڪيون، سريلنڪن بورڊ ۽ رانديگرن سميت سڀني وڏي حوصلي سان هتي رهڻ جو فيصلو ڪيو. بعد ۾ پارليامينٽ ٻاهران صحافين سان غير رسمي ڳالهه ٻولهه ڪندي محسن نقوي چيو ته وانا ڪيڊٽ ڪاليج ۽ اسلام آباد ۾ حملا ڪندڙ افغان شهري هئا. هن چيو ته افغانستان کان ڪارروائي بابت حڪومتي سطح تي فيصلو ڪيو ويندو، اِهو نٿو ٿي سگهي ته افغانستان مان حملا ٿيندا رهن ۽ هو چپ ويهن. محسن نقوي چيو ته دورو جاري رکڻ تي هو سريلنڪن صدر، حڪومت، ڪرڪيٽ بورڊ ۽ رانديگرن جا ٿورائتا آهن……………….