اهل ۽ تعليم يافته مقامي نوجوانن کي نوڪريون فراهم ڪيون وڃن: پ پ ايم اين اي علاءُ الدين جوڻيجو

سانگهڙ ۾ قائم سماجي ويلفيئر ڪميٽي آئل اينڊ گيس جي چيئرمين ۽ پ پ ايم اين اي علاءُ الدين جوڻيجي، پي پي ايل، يو اي پي ۽ او جي ڊي سي ايل جي آفيسرن کي هدايت ڪئي آهي ته اهل ۽ تعليم يافته مقامي نوجوانن سان گڏ نان اسڪل پوسٽن تي به مقامي ماڻهن کي نوڪريون فراهم ڪيون وڃن. سانگهڙ ضلعي ۾ قائم سماجي ويلفيئر ڪميٽي آئل اينڊ گيس جو اجلاس ڪميٽي چيئرمين ۽ ايم اين اي علاءُالدين جوڻيجي جي صدارت هيٺ ٿيو. اجلاس ۾ ڪميٽي جي ميمبرن، مقامي انتظاميا ۽ تيل توڙي گيس ڪمپنين جي آفيسرن شرڪت ڪئي. اجلاس دوران علائقي ۾ جاري سماجي ۽ ترقياتي منصوبن، عوامي ڀائي جي ڪمن ۽ ڪميونٽي سپورٽ پروگرامن جو تفصيلي جائزو ورتو ويو. اجلاس ۾ ايم اين اي علاؤالدين جوڻيجو چيو ته سڀئي ٽائون ۽ يونين ڪائونسلن جا چيئرمين به ويلفيئر ڪميٽي جا ميمبر آهن، انهن کي گهرجي ته پنهنجن علائقن مان صحت، تعليم، پيئڻ جي صاف پاڻي ۽ ٻين بنيادي ضرورتن بابت پنهنجون اسڪيمون جمع ڪرائن سڀني ميمبرن کي گڏ کڻي هلندا. هن سڀني آئل اينڊ گيس ڪمپنين جي آفيسرن کي هدايت ڪئي ته هو ملازمن جي ڊيٽا شيئر ڪن ته جيئن مقامي ماڻهن کي ملازمت سان گڏوگڏ بنيادي سهولتون مهيا ڪري سگهجي. قومي اسيمبلي جي ميمبر ۽ ويلفيئر ڪميٽي جي چيئرمين پي پي ايل، يو اي پي ۽ او جي ڊي سي ايل جي آفيسرن کي هدايت ڪئي ته اهل ۽ تعليم يافته مقامي نوجوانن سان گڏ نان اسڪل پوسٽن تي به مقامي ماڻهن کي نوڪريون فراهم ڪيون وڃن. ڊپٽي ڪمشنر سانگهڙ ساره جاويد چيو ته سڀني آئل اينڊ گيس ڪمپنين کي گهرجي ته هو انٽر شپ پروگرام شروع ڪري مقامي نوجوانن کي تربيت ڏين ۽ کين نار ملڪن ڏانهن موڪلين، جنهن سان قومي خزاني تي مثبت اثر پوندا. اجلاس ۾ ضلعي ڪائونسل جي چيئرمين سيد رياض حسين شاهه خراساني، ٽنڊو آدم ميونسپل ڪميٽي جي چيئرمين چاچا غلام مرتضيٰٰ جوڻيجو، ٽائون چيئرمين راڻا راشد، راڻا حاجي انور، گل محمد ڏاھري ۽ ڀاون داس سميت يونين ڪائونسلن جا چيئرمين ۽ ٻين لاڳاپيل کاتن جا آفيسر پڻ شريڪ ٿيا.