آءِ ايم ايف جي ايگزيڪٽو بورڊ جو اجلاس اڄ ٿيندو، قرض منظوري جي اميد

ناڻي واري وفاقي وزير محمد اورنگزيب اميد ظاهر ڪئي آهي ته اڄ ٿيندڙ آءِ ايم ايف جي بورڊ اجلاس ۾ 7 ارب ڊالرن جو قرض ملي ويندو. پاڪستان ريجنل اڪنامڪ فورم ۽ پاڪستان ۾ چين جي سفارتخاني جي ڀائيواري سان ڪوٺايل پرائيويٽ سيڪٽر انويسٽمينٽ ڊائيلانگ سي پيڪ ٽو تي نيويارڪ مان وڊيو لنڪ ذريعي خطاب ڪندي وفاقي وزير چيو ته حڪومتي قدمن سان مهانگائي ۽ وياج جي شرح ۾ گهٽتائي آئي آهي، پاڪستان ٽيڪس، توانائي ۽ ادارتي پروگرام تحت سڌارن واري ايجنڊا تي عمل جاري رکندو. محمد اورنگزيب وڌيڪ چيو ته  هو پنهنجي جاري سڌارن واري ايجنڊا مان مطمئن آهن ۽ پاڪستان ۾ معاشي استحڪام اچي رهيو آهي، سيڙپڪاري جي اعتماد ۾ اضافو ٿيو، جنهن سبب ملڪ ۾ پرڏيهي سيڙپڪاري ۾ واڌ ٿي رهي آهي. وفاقي وزير جو چوڻ هو ته قرض پروگرام لاءِ آءِ ايم ايف جي لازمي شرطن کي پورو ڪرڻ ۽ پاڪستان جي معاشي استحڪام لاءِ سهڪار تي پاڪستان چين جو ٿورائتو آهي.