جسٽس يحيٰ آفريدي سپريم ڪورٽ جو نئون چيف جسٽس ٿيندو

جسٽس يحيٰ آفريدي سپريم ڪورٽ جو نئون چيف جسٽس ٿيندو، خاص ڪميٽيءَ  جسٽس يحيٰ آفريديءَ کي سپريم ڪورٽ جو نئون چيف جسٽس مقرر ڪرڻ تي اتفاق ڪري ورتو آهي. 26هين آئيني ترميم لاڳو ٿيڻ بعد سپريم ڪورٽ جي نئين چيف جسٽس جي مقرريءَ لاءِ خاص پارلياماني ڪميٽيءَ جو پهريون اجلاس ٿيو. ٻارهن رڪني خاص پارلياماني ڪميٽيءَ جو بند ڪمري ۾ اجلاس پارليامينٽ هائوس جي ڪميٽي روم نمبر 5 ۾ ٿيو. سني اتحاد ڪائونسل جي ميمبرن اجلاس جو بائيڪاٽ ڪيو، اجلاس ۾ راجا پرويز اشرف، فاروق ايڇ نائڪ، سيد نويد قمر، ڪامران مرتضيٰ، رعنا انصار، احسن اقبال، شائسته پرويز ملڪ، اعظم نذير تارڙ ۽ خواجه آصف شريڪ ٿيا. ڪميٽيءَ ۾ چيف جسٽس جي مقرريءَ لاءِ سيڪريٽري قانون طرفان موڪليل ٽن ججن جا نالا رکيا ويا. اجلاس دوران سني اتحاد ڪائونسل ۽ پي  ٽي آءِ جي ميمبرن کي راضي ڪرڻ جو فيصلو ڪيو ويو ۽ اجلاس رات تائين ملتوي ڪيو ويو، قومي اسيمبلي جي اياز صادق بئرسٽر گوهر کي اجلاس ۾ شرڪت ڪرڻ جي درخواست ڪئي هئي، چار رڪني ڪاميٽي سان به ڳالهيون ناڪام رهيون. خاص پارلياماني ڪميٽيءَ جو اجلاس ٻيهر شروع ٿيو ڪنهن ۾ ٽن سينيئر ترين ججن جي نالن تي غور ڪيو ويو. ڪميٽيءَ جسٽس يحيٰ آفريديءَ کي سپريم ڪورٽ جو نئون چيف جسٽس مقرر ڪرڻ تي اتفاق ڪري ورتو آهي. خاص پارلياماني ڪميٽي جسٽس يحيٰ آفريديءَ جو نالو وزيراعظم ڏانهن موڪليندي، جنهن بعد  وزيراعظم صدر کي نئون چيف جسٽس مقرر ڪرڻ جي ايڊوائز ڏيندو. صدر جي منظوري بعد يحيٰ آفريديءَ کي سپريم ڪورٽ جو نئون چيف جسٽس مقرر ڪيو ويندو.