حڪومت پيپلز پارٽيءَ جا سمورا مطالبا منظور ڪري ورتا

حڪومت پيپلز پارٽيءَ جا سمورا مطالبا منظور ڪري ورتا. اسلام آباد ۾ مسلم ليگ ن ۽ پ پ جي ڳالهين واري ڪميٽيءَ جو اجلاس ٿيو. اجلاس دوران پ پ پنهنجا اعتراض حڪومت سامهون رکيا،  غور ويچار کانپوءِ حڪومت پ پ جا سمورا مطالبا منظور ڪري ورتا. ذريعن موجب ترقياتي فنڊن ۽ پنجاب ۾ انتظامي عهدن تي پ پ کي اوليت ڏني ويندي. اجلاس کانپوءِ پ پ جي ڳالهين واري ڪميٽي ۾ شامل نديم افضل چن چيو ته پنجاب جي معاملن ۾ گنجائش جو مسئلو هو، مڪاني ادارن جي چونڊن جو معاملو آهي. هن چيو ته پ پ چاهي ٿي ته ڪنهن کي انتقام جو نشانو نه بڻايو وڃي، پنجاب ۾ سٺي گورننس ڏني وڃي. سندس چوڻ هو ته حڪومت سان سندن ڪيترائي مسئلا حل ٿي چڪا آهن، هاڻي لکت معاهدي جي سلسلي ۾ ڳالهيون ٿي رهيون آهن.