- Advertisement -
سنڌ حڪومت خيرپور ۾ کجين جي پروسيسنگ ۽ پيداوار وڌائڻ لاءِ 100 ملين رپيا مختص ڪرڻ جو اعلان ڪري ڇڏيو.
سنڌ جي زراعت کاتي طرفان خيرپور ۾ کجين جي پيداوار وڌائڻ جي عنوان هيٺ کليل ڪچهري منعقد ڪئي وئي.
زراعت واري صوبائي وزير سردار محمد بخش مهر کي کجين جي آبادگارن ۽ هارين کي درپيش مسئلن کان آگاهه ڪيو ويو.
کليل ڪچھري ۾ سيڪريٽري زراعت رفيق احمد ٻرڙو، ڊي جي زراعت منير احمد جماڻي، ڊي سي خيرپور، هاري اڳواڻ غلام قاسم جسڪاڻي، واپاري اڳواڻ لالا عبدالغفار شيخ ۽ ٻين هارين شرڪت ڪئي.
سنڌ حڪومت پاران کجين ۽ ٻين ڪاروبار ۾ ڪم ڪندڙ عورتن کي وڌيڪ سهولتون ڏيڻ جو فيصلو ڪيو ويو.
زراعت واري وزير طرفان هارين کي رليف ڏيڻ لاءِ ڪوٽڏيجي ۾ قائم ريسرچ سينٽر کي وڌيڪ فعال ڪرڻ جو اعلان پڻ ڪيو ويو.
صوبائي زراعت واري وزير محمد بخش مهر چيو ته پاڪستان سڀ کان وڌيڪ خشڪ کجور ڀارت، گڏيل عرب امارات ۽ بنگلاديش کي برآمد ڪري ٿو، پاڪستان دنيا جو ٻيو نمبر وڏو کجور برآمد ڪندڙ ملڪ آهي.
محمد بخش مهر چيو ته سنڌ حڪومت کجيءَ جي فصل کي بحال ڪرڻ ۽ وڌائڻ جو منصوبو جوڙي ورتو آهي.
سندس چوڻ هو ته سنڌ حڪومت هن سال خيرپور ۾ کجين جي پروسيسنگ ۽ ان جي پيداوار وڌائڻ لاءِ 100 ملين رپيا رکيا آهن.
محمد بخش مهر چيو ته سنڌ ۾ پهريون ڀيرو خيرپور ۾ هارين لاءِ کليل ڪچهري منعقد ڪئي وئي.
هن چيو ته سنڌ حڪومت زرعي شعبي جي پيداوار وڌائڻ لاءِ عملي قدم کڻي رهي آهي، سنڌ ۾ ٿيندڙ کجور پنهنجي منفرد ذائقي ۽ بناوٽ جي ڪري سڄي دنيا ۾ مشهور آهي.
هن چيو ته سنڌ حڪومت صوبي ۾ زراعت تي خاص ڌيان ڏئي رهي آهي، موسمياتي تبديلين سبب 2022ع جي برساتن ۾ خيرپور، سکر ۽ گهوٽڪي ۾ کجي جي فصل کي نقصان پهتو.
محمد بخش مهر جو چوڻ هو ته خيرپور، سکر ۽ گهوٽڪي سميت ٻين ضلعن ۾ آبادگارن پاران پاڻي کوٽ جون شڪايتون ملي رهيون آهن.- Advertisement -
