وزيراعظم شهباز شريف، ملڪ مان پوليو جي مڪمل خاتمي لاءِ خاص مهم جي شروعات ڪري ڇڏي

وزيراعظم شهباز شريف، ملڪ مان پوليو جي مڪمل خاتمي لاءِ خاص مهم جي شروعات ڪري ڇڏي. اسلام آباد پوليو مهم شروع ڪرڻ جي سلسلي ۾ تقريب منقعد ڪئي وئي، جنهن ۾ وزيراعظم شهباز شريف، ڊاڪٽر مختار ڀرٿ، عائشه رضا فاروق، ورلڊ هيلٿ آرگنائيزيشن، يونيسيف جي نمائندن سميت ٻين شرڪت ڪئي. تقريب کي خطاب ڪندي وزيراعظم شهباز شريف چيو ته ملڪ جي 115 ضلعن ۾ پوليو مهم شروع ڪئي وئي آهي، جنهن ۾ 5 سال کان ننڍي عمر جي 3 ڪروڙ ٻارن کي هن موذي مرض کان بچاءُ جي ويڪسين ڏني ويندي. وزيراعظم چيو ته 9 کان 15 سيپٽمبر تائين هن خاص مهم تحت 2 لک 86 هزار پوليو ورڪرز گهر گهر وڃي ٻارن کي پوليو کان بچاءَ جا ڦڙا پياريندا. هن چيو ته پاڪستان مان پوليو جهڙي موذي مرض جي خاتمي لاءِ حڪومت سان سهڪار ڪرڻ وارا ڀائيوارن ۽ دوست عالمي تنظيمن جا ٿورائتيا آهن. سندس چوڻ هو ته اميد آهي ته وفاقي حڪومت صوبائي حڪومتن  ۽ ڀائيوارن سان گڏجي پوليو کي ملڪ منا مڪمل خاتمي ۾ ڪامياب ٿيندي.