آئيني ترميم واري معاملي تي اڳڀرائي نه ٿيڻ سبب قومي اسيمبلي ۽ سينيٽ جا اجلاس اڻڄاڻايل مدي تائين ملتوي ڪيا ويا آهن.
سپريم ڪورٽ ۽ هائيڪورٽن جي ججن جي ملازمت ۾ اضافي ۽ نئين آئيني عدالت قائم ڪرڻ سميت ٻين ترميمن جي منظوري لاءِ آچر ڏينهن قومي اسيمبلي ۽ سينيٽ اجلاس طلب ڪيا ويا، پر مولانا فضل الرحمان ۽ مخالف ڌر جي اعتراضن توڙي تجويزن سبب آئيني ترميمون منظوريءَ لاءِ قومي اسيمبليءَ ۾ پيش نه ٿي سگهيون.
سينيٽ جي اجلاس جو وقت به ٽي ڀيرا تبديل ڪيو ويو، ان سلسلي ۾ پارليامينٽ جي خاص ڪميٽيءَ جا به هڪ ئي ڏينهن ۾ چار اجلاس ٿيا، جنهن ۾ سمورين تجويزن جو تفصيلي جائزو ورتو ويو.
اڄ به آئيني ترميمن تي سمورين پارٽين جو راضپو نه هجڻ سبب پهريان سينيٽ ۽ پوءِ قومي اسيمبليءَ جو اجلاس اڻڄاڻايل مدي تائين ملتوي ڪيو ويو.
