ميئر ڪراچي مرتضيٰ وهاب چيو آهي ته آچر تي جيالا پنهنجو ٽيلر ڏيکاريندا ۽ تير تي ٺپا هڻي پ پ اميدوارن کي ڪامياب ڪندا.
صدر ٽائون يوسي 13 ۾ گزري جي چاندني چوڪ تي چونڊ مهم جي حوالي سان ڪوٺايل جلسي کي خطاب ڪندي ميئر ڪراچي مرتضيٰ وهاب جو چوڻ هو ته هو عظيم عاليشان ريلي ڪڍي جلسو منعقد ڪرڻ تي اڳواڻن کي مبارڪون ٿو ڏئي.
هن چيو ته هن يوسي جي عوام جو فيصلو پ پ چيئرمين بلاول ڀٽو زرداري جي حق ۾ آهي ۽ اهي پارٽي جي اميدوارن کي ووٽ ڏئي ڪامياب ڪندا.
ميئر ڪراچي چيو ته مٿن جيڪي الزام هڻندا هئا ته هو شهري نه پر غير مقامي آهن، پر اهڙن الزامن کي عوام رد ڪري ڇڏيو آهي، جماعتي گزري مان ئي ڀڃي ويا آهن، هن حلقي ۾ سموريون ٻوليون ڳالهائيندڙ ماڻهو پيپلز پارٽي جو حصو آهن.
سندس چوڻ هو ته ايندڙ حڪومت پ پ جي هوندي ۽ بلاول ڀٽو زرداري کي وزيراعظم بڻايو ويندو، پاڪستان پيپلز پارٽي عوامي پارٽي آهي جنهن کي عوام سدائين مينڊٽ ڏئي اقتدار ۾ آندو آهي.
ميئر ڪراچي وڌيڪ چيو ته پاڪستان پيپلزپارٽي جي چيئرمين بلاول ڀٽو زرداري جي خاص ڌيان ڏيڻ تي ڪراچي واسي سندس جا ٿورائتا آهن جنهن سنڌ حڪومت هوندي ڪراچي لاءِ کوڙا سارا ترقياتي ڪمن جا پراجيڪٽ ڏنا، شهرين لاءِ راندين جي گرائونڊن کان پارڪن جي سهولت لاءِ نوان روڊ رستا تعمير ڪرائي ڏنا .
هن چيو ته ڪافي هنڌن تي اڃان به ڪم جاري آهن، مخالف ڪراچي شهر جي ترقي نه ٿا چاهن، هو سدائين انهن کي گڏ کڻي هلڻ چاهن ٿا، ڪراچي ۾ هڪڙي جماعت گٽر نالن تي سياست ڪري رهي آهي پر عوام کين چڱي ريت سڃاڻي ورتو آهي.
ان موقعي تي ڪرم الله وقاصي سميت ٻين مقامي اڳواڻن پن جلسي کي خطاب ڪيو.
