سپريم ڪورٽ آڊيو ليڪس ڪميشن ڪيس ۾ پي ڊي ايم حڪومت جا عدالتي بينچ تي اعتراض رد ڪري ڇڏيا.
چيف جسٽس آف پاڪستان عمر عطا بنديال جي خواشدامن، خواجا طارق رحيم جي گهرواري، اڳوڻي چيف جسٽس ثاقب نثار جي پٽ، جسٽس مظاهر نقوي، عابد زبيري ۽ پرويز الاهي جي مبينا آڊيو ليڪس تي حڪومت انڪوائري ڪميشن جوڙي ڇڏي هئي.
حڪومت 9 مبينا آڊيو ليڪس جي جاچ لاءِ جسٽس قاضي فائز عيسيٰ جي سربراهيءَ ۾ انڪوائري ڪميشن جوڙي هئي، جنهن ۾ اسلام آباد ۽ بلوچستان هائيڪورٽن جا چيف جسٽس شامل هئا، جنهن تي عدالت چيف جسٽس عمر عطا بنديال جي سربراهي ۾ جسٽس اعجاز الاحسن، جسٽس منيب اختر، جسٽس حسن اظهر ۽ جسٽس شاهد وحيد تي ٻڌل 5 رڪني بينچ جوڙي هئي.
عدالتي بينچ هن ڪيس جون ٻه ٻڌڻيون ڪيون ۽ آڊيو ليڪس ڪميشن کي ڪم ڪرڻ کان روڪي ڇڏيو هو.
گذريل حڪومت مفادن جي ٽڪراءَ سبب ٽن ججن کي بينچ مان ڌار ڪرڻ لاءِ ڌار درخواست داخل ڪئي هئي، حڪومت طرفان بينچ ۾ شامل ٽن ججن چيف جسٽس عمر عطا بنديال، جسٽس اعجاز الاحسن ۽ جسٽس منيب اختر تي اعتراض اٿاريا ويا هئا.
عدالت حڪومت طرفام بينچ تي اعتراض جي ڌار درخواست تي ٻڌڻي بعد 6 جون تي فيصلو محفوظ ڪيو هو جيڪو 3 مهينن کانپوءِ جسٽس اعجاز الاحسن ٻڌائي ڇڏيو.
سپريم ڪورٽ ٽن ججن تي حڪومتي اعتراض واري درخواست رد ڪري ڇڏي ۽ عدالت مختصر فيصلو ٻڌائيندي اڳوڻي حڪومت جي بينچ تي اعتراضن کي عدليه جي آزادي تي حملو قرار ڏئي ڇڏيو.
جسٽس اعجاز الاحسن فيصلو ٻڌائيندي چيو ته ججن تي اعتراض ڪرڻ عدالت تي حملي جي برابر آهي.
سپريم ڪورٽ هن ڪيس جو تفصيلي فيصلو بعد ۾ جاري ڪندي.
