مسلم ليگ نون جي اڳواڻ جاويد لطيف چيو آهي ته اوهان جڙانوالا واقعي ۾ مذهبي سازشن کي وائکو ڪري سگهو ٿا، اهڙي طرح ملڪ ۽ رياست خلاف سازشن کي به وائکو ڪرڻو پوندو، ملڪ ۾ ٿيندڙ فيصلن سان رياست کي نقصان ٿي رهيو آهي، جيستائين سازش کي وائکو نه ڪيو ويندو معاملا ٺيڪ نه ٿيندا، مهانگائي جي ٻوڏ عوام کي کائي رهي آهي، بجلي جي بلن ۾ ٻه ٽي رپيا يونٽ گهٽ ڪرڻ سان معاملو حل نه ٿيندو.
لاهور ۾ پريس ڪانفرنس ڪندي جاويد لطيف چيو ته اڄ هر گهر ۾ عدم استحڪام وڌي رهيو آهي، سڄي ملڪ ۾ بجلي جي بلن خلاف احتجاج ٿي رهيا آهن، هن سازش پٺيان لڪل ذميوارن کي سامهون آڻڻ تائين ملڪ ۾ استحڪام نه ايندو.
سندس چوڻ هو ته رياست کي نقصان پهچائيندڙ فيصلن کي عوام آڏو آڻڻو پوندو، 75 ورهين ۾ اڄ تائين ملڪ ۾ ايتريون درخواستون ڪنهن لاءِ عدالتن ۾ ناهن ويون.
مسلم ليگ نون جي اڳواڻ جاويد لطيف چيو ته انصاف ڏيندڙ قابل احترام شخصيت قاضي فائز عيسيٰ خلاف ريفرنس داخل ڪيو ويو، اڄ تائين چيو پيو وڃي نواز شريف ملڪي آئين ۽ قانون کي منهن ڏئي.
هن چيو ته ڇا شهيد ذوالفقار علي ڀٽو سان انصاف ٿيو هو؟، ڇا نواز شريف خلاف سازش ڪندڙ ڪردار وائکا ٿي چڪا آهن، اوهان اڄ به انهن ڪردارن کي عدالت جي ڪٽهڙي ۾ بيهارڻ لاءِ تيار ناهيو.
مسلم ليگ نون جي اڳواڻ جاويد لطيف چيو ته ملڪ خلاف سازشون ڪندڙن کي عوام آڏو آڻڻ رياستي ادارن جي سربراهن جي ذميواري آهي، 2017ع جي ڪردارن کي به عوام آڏو آندو وڃي
