جماعت اسلامي عدليا، اليڪشن ڪميشن ۽ ٻين ادارن کان غير جانبدار رهڻ جو مطالبو ڪري ڇڏيو، سراج الحق جو چوڻ آهي ته عدليا، اليڪشن ڪميشن ۽ ٻيا ادارا غير جانبدار رهن ته ملڪ ترقي ڪندو، ملڪي معيشيت تباهه ٿي وئي آهي، ملڪ جو ٻچو ٻچو آءِ ايم ايف جو قرضي بڻجي ويو آهي، اڳوڻو وزيراعظم شهباز شريف آءِ ايم ايف جي چوڻ تي هر عمل لاءِ تيار رهيو، 16 مهينن جي حڪومت ۾ شهباز شريف رڳو قرض وٺڻ ۾ ڪامياب ٿيو باقي ڪجهه نه ڪيو.
سکر ۾ هائيڪورٽ بار کي خطاب ڪندي سراج الحق چيو ته وڪيل معاشري جو اهم حصو آهن، وڪيل غريبن جا همدرد ۽ ظلم سان وڙهڻ وارا آهن، بار ۾ حقيقي جمهوريت آهي.
سندس چوڻ هو ته پاڪستان ڪنهن جنرل يا سياستدان نه پر وڪيل ٺاهيو آهي، وڪيل کي ملڪ کي بچائيندا، بار ۽ سياسي ماڻهن کي گڏجي ڪم ڪرڻ گهرجي.
جماعت اسلامي جي امير سراج الحق چيو ته آزادي نعمت آهي، 70 ورهين ۾ جيڪو ڪجهه ٿيو اهو ڏسڻو پوندو، ملڪ ۾ انصاف جي کوٽ آهي جنهن لاءِ جدوجهد ڪرڻي پوندي، ملڪ ۾ هو پاڻ محفوظ ناهي، مٿس حملو ٿيو ته شهباز شريف چيو جاچ ڪرائي ويندي پر اڃا تائين ڪجهه ناهي ٿيو.
هن چيو ته فاطما ڦرڙو کي قتل ڪيو ويو، ڊاڪٽر ۽ هندو اغوا ٿي رهيا آهن پر هتان جي پوليس چئي ته ڌاڙيلن وٽ جديد هٿيار آهن، پوليس کي 2 ڪلو ميٽر پري نشانو بڻايو پيو وڃي.
جماعت اسلامي جي امير سراج الحق چيو ته آئين ۽ قانون جي حڪمراني سان ئي امن قائم ٿي سگهي ٿو، نگران حڪومت ڪجهه نٿي ڪري سگهي، جماعت اسلامي 90 ڏينهن ۾ اليڪشن جو مطالبو ڪري ٿي.
سندس چوڻ هو ته پاڪ فوج سياسي پارٽين جو حصو نه ٿئي پر نيوٽرل رهي، سپريم ڪورٽ ۾ هر جج جي چهري کي ڏسي پارٽي جو نالو ٻڌايو وڃي ٿو اهو قوم لاءِ موت برابر آهي.
جماعت اسلامي جي امير سراج الحق چيو ته عدليا، اليڪشن ڪميشن ۽ ٻيا ادارا غير جانبدار رهن ته ملڪ ترقي ڪندو، ملڪي معيشيت تباهه ٿي وئي آهي، ملڪ جو ٻچو ٻچو آءِ ايم ايف جو قرضي بڻجي ويو آهي، اڳوڻو وزيراعظم شهباز شريف آءِ ايم ايف جي چوڻ تي هر عمل لاءِ تيار رهيو، 16 مهينن جي حڪومت ۾ شهباز شريف رڳو قرض وٺڻ ۾ ڪامياب ٿيو باقي ڪجهه نه ڪيو.
