بي اين پي مينگل جي سربراهه سردار اختر مينگل قومي اسيمبليءَ جي ميمبرشپ تان استعيفيٰ ڏئي ڇڏي آهي.
جاري ڪيل بيان ۾ سردار اختر مينگل چيو ته هو قومي اسيمبليءَ جي سيٽ تان استعيفيٰ جو اعلان ڪري ٿو، هو پنهنجن ماڻهن لاءِ ڪجهه به نه ڪري سگهيو، 65 هزار ماڻهو کانئس ناراض ٿيندا، هو سڀني کان معافي گهري ٿو.
پي اين پي سربراهه چيو ته بلوچستان جي معاملي ۾ ماڻهن جي دلچسپي ناهي، جڏهن به ان مسئلي تي ڳالهايو وڃي ٿو ته بليڪ آئوٽ ٿي ويندو آهي، هن سياست کان بهتر آهي ته هو پڪوڙن جو دڪان کولي ڇڏي.
سردار اختر مينگل چيو ته اسيمبلي سندن آواز نه ٿي ٻـُڌي ته ان ۾ ويهڻ جو ڪو به فائدو ناهي، هو مايوس ٿي چڪو آهي، محمود خان اچڪزئي ان اميد ۾ آهي ته شايد کيس پارليامينٽ مان ڪجهه ملندو.
