سعودي عرب، اسرائيل طرفان غزا ۾ جنگبديءَ ۾ دير سبب آمريڪا سان اهم دفاعي معاهدي جي پيروي ختم ڪري ڇڏي

سعودي عرب، اسرائيل طرفان غزا ۾ جنگبديءَ ۾ دير سبب آمريڪا سان اهم دفاعي معاهدي جي پيروي ختم ڪري ڇڏي آهي. پرڏيهي خابرو اداري رائٽرز موجب ٻن سعودي ۽ چار اولهه جي عملدارن ٻڌايو ته سعودي عرب آمريڪا سان دفاعي معاهدو معطل ڪري ڇڏيو آهي. ذريعن موجب هڪ مڪمل طور تيار ٿيل آمريڪي سعودي معاهدي کي آمريڪي سينيٽ مان ٻه ڀاڱي ٽي اڪثريت سان پاس ڪرائڻ جي ضرورت هوندي پر اهو ان وقت تائين شروع نه  ٿي سگهندو جيستائين رياض اسرائيل کي تسليم نٿو ڪري. معاهدي ۾ علائقائي خطرن خاص طور ايران کي منهن ڏيڻ لاءِ گڏيل فوجي مشقن ۽ مشقن کي وڌائڻ شامل آهي. ذريعن موجب اهو معاهدو آمريڪا ۽ سعودي دفاعي فرمن وچ ۾ ڀائيواري کي هٿي ويندو، جڏهن ته  معاهدو جديد ٽيڪنالاجي خاص طور ڊورن دفاعي شعبي ۾ سعودي سيڙپڪاري کي هٿي  ڏيندو. گلف ريسرچ انسٽيٽيوٽ جي سربراهه عبدالعزيز الصغير چيو ته سعودي عرب کي هڪ سڪيورٽي ڊيل ملندي جيڪا وڌيڪ فوجي سهڪار ۽ آمريڪي هٿيارن جي وڪري جي اجازت ڏيندي. هلندڙ سال جي شروعات ۾ هڪ وسيع پئماني تي گڏيل سلامتي جو معاهدو حاصل ڪرڻ جي مهم ۾ سعودي عرب فلسطيني رياست بابت پنهنجي موقف ۾ نرمي ڪندي آمريڪا کي ٻڌايو ته اسرائيل طرفان ٻه رياستي حل لاءِ عوامي عزم نار رياست کي معمول تي آڻڻ لاءِ ڪافي ٿي سگهي ٿو. پر غزا ۾  اسرائيل جي فوجي ڪاررواين تي سعودي عرب ۽  وچ اوڀر ۾ عوام ڏک ۽ ڪاوڙ سبب سعودي ولي عهد محمد بن سلمان هڪ ڀيرو ٻيهر اسرائيل کي تسليم ڪرڻ کي مشروط قرار ڏيندي چيو ته هو هڪ فلسطيني رياست قائم ڪرڻ لاءِ پختا قدم کڻندا. اولهه جي سفارتڪارن جو چوڻ آهي ته اسرائيلي وزيراعظم بن يامن نيتن ياهو هاڻي به سعودي ۽ عرب دنيا ۾ قبوليت ماڻڻ لاءِ بي چين آهي.