سنڌ ترقي پسند پارٽي جي سربراهه ڊاڪٽر قادر مگسي چيو آهي ته سنڌو درياهه مٿان 6 ڪئنال ڪڍڻ سنڌ کي بنجر بنائڻ جي سازش آهي، جنهن کي سنڌ جو عوام ڪنهن به صورت ۾ قبول نه ڪندو.
ڊسٽرڪٽ پريس ڪلب ملير ۾ ميٽ دي پريس کي خطاب ڪندي ڊاڪٽر قادر مگسي چيو ته سنڌو مان ڪئنال ڪڍڻ خلاف 8 ڊسمبر تي ڪراچي ۾ تاريخي ڌرڻو هنيو ويندو، جنهن ۾ ڌرتي ڌڻي ڪئنالن کي رد ڪرڻ جو مطالبو ڪندا.
هن چيو ته سنڌو درياهه مان 6 نوان ڪئنال ڪڍڻ وارو فيصلو آصف علي زرداري جي صدارت هيٺ اجلاس ۾ ٿيو آهي، هو سمجهن ٿا ڪئنال اڏڻ سنڌ دشمن منصوبو آهي، جنهن خلاف سڄي سنڌ سراپا احتجاج بڻيل آهي.
سندس چوڻ هو ته ڪئنالن جي اڏاوت جو فيصلو مشرف دور ۾ ٿيو هو، جنهن ۾ 8 ڪئنال ٺاهڻا هئا، کين چيو ويو ته اوهان کي ريڻي ڪئنال ٺاهي ٿا ڏين، جنهن تي هُنن چيو ته کين ڪئنال نه گهرجي، گڊو، سکر ۽ ڪوٽڙي بئراج کي پاڻي ڏنو وڃي، جنهن بعد ڪئنالن جو منصوبو سرد خاني حوالي ٿي ويو.
ڊاڪٽر قادر مگسي چيو ته بيروزگاري عذاب بڻيل آهي، حڪمران اربين روپين جا سنڌ دشمن منصوبا ٺاهي رهيا آهن، پنجاب ۾ شروع ٿيندڙ چولستان ڪئنال لاءِ 211 ارب روپيا رکيا ويا آهن.
سندس چوڻ هو ته ڪئنالن خلاف 8 ڊسمبر تي گورنر هائوس ڪراچي آڏو تاريخي ڌرڻو هنيو ويندو جنهن ۾ لکين سنڌ واسي شريڪ ٿيندا.
ان موقعي ايس ٽي پي اڳواڻ گلزار سومرو، عاشق ٿهيم، خير محمد مگسي ۽ ٻيا موجود هئا.
