سنڌ جي مختلف شهرن ۾غزا تي اسرائيلي بمباري خلاف عدالتي ڪاررواين جو بائيڪاٽ ڪري احتجاجي ريليون ڪڍي مظاهرا ڪيا ويا.
ڪراچي ۾ پاڪستان بار جي سڏ تي ڪراچي بار پاران عدالتي ڪاررواين جو بائيڪاٽ ڪيو جڏهن ته اهم ڪيسن جون ٻڌڻيون ججز چيمبر ۾ ڪيون.
خيرپور ۾ ڊسٽرڪٽ بار ايسوسي ايشن پاران اسرائيل جي غزا تي حملن خلاف عدالتي ڪارروائي جو بائيڪاٽ ڪندي ايڊووڪيٽ جعفر علي شاهه ۽ ٻين جي اڳواڻيءَ ۾ عدالت کان پريس ڪلب تائين احتجاجي ريلي ڪڍي مظاهرو ڪري اسرائيل جي جهنڊي کي باهه ڏئي ساڙيو ويو.
لاڙڪاڻي ۾ زبيده فضل ڊي سينٽ هاءِ اسڪول پاران فلسطينين جي حمايت ۽ اسرائيلي ظلم خلاف اسد الله، راشد علي مغيري، عمار شيخ ۽ ٻين جي اڳواڻيءَ ۾ احتجاجي ريلي ڪڍي پريس ڪلب اڳيان مظاهرو ڪري نعريبازي ڪئي وئي.
قاضي احمد ۾ غزا تي اسرائيلي بمباري خلاف سماجي اڳواڻ حفيظ الرحمان جوڻو ۽ ٻين جي اڳواڻيءَ ۾ احتجاجي ريلي ڪڍي پريس ڪلب اڳيان مظاهرو ڪيو ويو.
اڳواڻن جو چوڻ آهي ته اسرائيل پاران فلسطينين جي نسل ڪشي ڪئي پئي وڃي پر افسوس عالمي برادري خاموش آهي.
هنن چيو ته اسرائيل پاران غزا تي بمباري جاري آهي پر گڏيل قومون رڳو اجلاسن تائين محدود آهن.
سندن چوڻ هو ته اسرائيل فلسطينين لاءِ زمين تنگ ڪندي پاڻي، بجلي ۽ تيل سميت امدادي سامان جي پهچ بند ڪري ڇڏي آهي.
اڳواڻن گڏيل قومن سميت عالمي برادري کان مطالبو ڪيو ته فوري طور غزا تي اسرائيل جي بمباري بند ڪرائي فلسطينين کي ريسڪيو ڪيو وڃي………
