تنگواڻيءَ ۾ بدامني ۽ اسڪول ويندڙ استاد کان ڦر ڪرڻ واري واقعي خلاف احتجاجي مظاهرو ڪري ڌرڻو هنيو ويو.
حيات پوليس چوڪي ويجهو هٿياربندن هٿيارن جي زور تي موٽرسائيڪل تي اسڪول ويندڙ استاد نثار کوسي کي روڪي موٽرسائيڪل، روڪ رقم ۽ ٻيو سامان ڦر ڪري فرار ٿي ويا.
شهرين طرفان رحمدل لاشاري، اعجاز ملڪ، نثار کوسي ۽ ٻين جي اڳواڻيءَ ۾ ريلوي ڦاٽڪ وٽ احتجاجي مظاهرو ڪري ڌرڻو هڻي نعريبازي ڪئي وئي.
ڌرڻي سبب جعفر آباد روڊ تي ٽريفڪ معطل ٿي وئي ۽ مسافرن کي پريشانين کي منهن ڏيڻو پئجي ويو.
احتجاج ڪندڙن ميڊيا سان ڳالهائيندي چيو ته شهر ۽ ڀرپاسي وارن علائقن ۾ بدامني وڌي وئي آهي چوري، ڦر ۽ ڌاڙا روز جو معمول بڻجي ويا آهن.
هنن چيو ته هٿياربندن هٿيارن جي زور تي موٽرسائيڪل تي اسڪول ويندڙ استاد نثار کوسي کي روڪي موٽرسائيڪل، روڪ رقم ۽ ٻيو سامان ڦر ڪري ويا.
سندن چوڻ هو ته ڏوهارين عوام جو جيئڻ جنجال ڪري ڇڏيو آهي ۽ پوليس امن امان قائم ڪرائڻ ۾ مڪمل طور ناڪام ٿي وئي آهي جنهن سبب شهري پاڻ کي غير محفوظ سمجهڻ لڳا آهن.
احتجاج ڪندڙن آءِ جي سنڌ ۽ ٻين وس وارن کان مطالبو ڪيو ته بدامني تي ضابطو آڻي استاد نثار کوسي کان ڦر ٿيل سامان واپس ڪرائي ملوث جوابدارن کي قانون جي ڪٽهڙي ۾ آندو وڃي ٻي صورت ۾ احتجاج جاري رهندو.
