سنڌ ۾ تيز هوائن سان گڏ وسڪاري سبب واهن، شاخن ۽ سم نالن کي گهارا پوڻ جو سلسلو جاري

سنڌ ۾ تيز هوائن سان گڏ وسڪاري سبب واهن، شاخن ۽ سم نالن کي گهارا پوڻ جو سلسلو جاري آهن، گهارن سبب هزارين ايڪڙ فصل ٻڏي ويو، سوين ڳوٺ پاڻيءَ هيٺ اچي ويا. ان سلسلي ۾ بلڙي شاهه ڪريم ويجهو ڪارو گونگڙو سم نالي کي ڳوٺ علي محمد کوکر وٽان 15 فوٽ گهارو پئجي ويو. ڪارو گونگڙو سم نالي کي گهارو پوڻ سبب سوين ايڪڙن تي بيٺل فصل ٻڏي ويو، پاڻي ڳوٺ علي محمد کوکر ۾ سوين گهرن اندر داخل ٿي ويو. هوڏانهن گولاڙچي ويجهو ڳوٺ مٺو ميمڻ وٽان امير شاهه سم نالي کي لڳل گهارو بند نه ٿي سگهيو، گهاري سبب 25 کان وڌيڪ ڳوٺ پاڻي هيٺ اچي ويا. ڳوٺ فيض محمد سميجو وٽان شاخ کي لڳل گهارو به وڌي 70 فوٽ ٿي ويو، شير واهه ۽ بهادر واهه جا گهارا ڳوٺاڻن پنهنجي مدد پاڻ تحت بند ڪري ڇڏيا. ٻئي طرف ماتلي ويجهو ڦليلي واهه مان نڪرندڙ مراد واهه کي آر ڊي 58 وٽان گهرو لڳڻ سبب ڳوٺ مجنون کوسو، الله بخش کوسو ۽ بشام کوسو ڳوٺ پاڻي هيٺ اچي ويا، سوين ايڪڙ فصل ٻڏي ويو. متاثر ڳوٺاڻن پاران سنڌ حڪومت کان نقصان جو ازالو ڪرڻ جو مطالبو ڪيو ويو آهي.