سنڌ ۾ پيپلزپارٽي جي حڪومت ختم ٿيڻ تي جماعت اسلامي ۽ ايس يو پي پاران مختلف شهرن ۾ نجات جو ڏهاڙو ملهايو ويو.
ڪشمور ۾ جماعت اسلامي پاران پ پ حڪومت ختم ٿيڻ تي يومِ نجات ملهايو ويو، ڪارڪنن پاران افضل عطا ڪلوڙ، ذوالفقار ملڪ، وزير چنا ۽ ٻين جي اڳواڻي ۾ ريلي ڪڍي وئي.
ڪنڌڪوٽ ۾ ايس يو پي ڪارڪنن پاران دلمراد ڏاهاڻي، ڇوٽو جکراڻي ۽ ٻين جي اڳواڻي ۾ پ پ حڪومت ختم ٿيڻ تي گهنٽا گهر کان پريس ڪلب تائين ريلي ڪڍي وئي.
ڍورو نارو ۾ سنڌ يونائيٽيڊ پارٽي جي ڪارڪنن پاران روشن مڱريو، مهر علي سمون، بچل چوپاڻ، ولي نهڙي ۽ ٻين جي اڳواڻي ۾ پ پ حڪومت ختم ٿيڻ تي يوم نجات ملهائي ريلي ڪڍي وئي.
ان موقعي تي اڳواڻن جو چوڻ هو ته پيپلزپارٽي جي حڪومت پنجن سالن ۾ رڳو ڪرپشن جي ڪجهه به نه ڪيو.
هنن چيو ته صوبي ۾ امن امان جي صورتحال ايتري ته خراب ٿي چڪي آهي جو ماڻهو پنهنجي گهرن تائين محدود ٿي ويا آهن.
اڳواڻن چيو ته پ پ جي 15 سالن جي دور ۾ ڪرپشن ڪري سنڌ جا روڊ رستا تباهه ڪيا ويا ۽ نوڪريون به وڪرو ڪيون ويون.
