شرجيل ميمڻ جي محسن نقوي سان ملاقات، منشيات جي خاتمي ۽ امن امان سميت ٻين معاملن تي خيالن جي ڏي وٺ

وفاقي گهرو وزير محسن نقوي ۽ سينيئر صوبائي وزير شرجيل انعام ميمڻ وچ ۾ ملاقات ٿي آهي. ملاقات ۾ ملڪي امن امان، بين الصوبائي سهڪار، منشيات جي خاتمي ۽ عوامي خدمتن جي بهتري سميت مختلف معاملن تي ڳالهيون ٿيون. ملاقات دوران ڪراچي سميت سنڌ جي وڏن شهرن ۾ منشيات جي خاتمي ۽ امن امان بابت تفصيلي ڳالهه ٻولهه به ٿي. وفاقي گهرو وزير محسن نقوي سنڌ حڪومت کي ڪچي جي علائقن ۾ ڌاڙيلن ۽ ڏوهاري عنصرن خلاف ڪامياب آپريشن تي واڌايون ڏنيون. سنڌ جي سينيئر وزير شرجيل انعام ميمڻ چيو ته وفاق ۽ صوبن وچ ۾ رابطا ۽ سهڪار چئلينجن کي منهن ڏيڻ جو بهترين ذريعو آهي، قومي مفادن جي معاملن ۾ سمورن ادارن ۽ حڪومتن کي گڏجي ڪم ڪرڻ گهرجي، سنڌ حڪومت ڏوهن جي خاتمي، امن امان قائم ڪرڻ ۽ عوام جي تحفظ لاءِ پنهنجون ڪوششون وڌيڪ تيز ڪندي. وفاقي گهرو وزير محسن نقوي چيو ته امن امان قائم ڪرڻ ۽ منشيات جي خاتمي ۾ وفاقي حڪومت هر ممڪن سهڪار فراهم ڪندي، سنڌ پوليس چئلنجنگ حالتن ۾ بهادري، پيشواراڻي صلاحيتن ۽ عزم جو مظاهرو ڪندي امن امان جي بحالي لاءِ ساراهه جوڳو ڪردار ادا ڪيو. ٻنهي اڳواڻن اتفاق ڪيو ته وفاق ۽ صوبن وچ ۾ رابطن کي وڌيڪ مضبوط بڻائي عوامي مسئلا حل ڪيا ويندا.