صدر ڊاڪٽر عارف علوي ۽ نگران وزيراعظم انوار الحق ڪاڪڙ ملڪ جي بچاءَ واري ڏهاڙي جي موقعي تي ڌار ڌار پيغام جاري ڪندي شهيدن کي خراج تحسين پيش ڪيو آهي.
بچاءَ ۽ شهيدن واري ڏهاڙي تي پنهنجي پيغام ۾صدر عارف علوي چيو ته وطن جي بهادر پٽن دشمنن خلاف دليري سان وڙهندي تاريخ جو نئون باب رقم ڪيو.
هن چيو ته شهيد قوم جا محسن آهن، اڄوڪي ڏينهن تي پاڪ فوج ۽ قوم بي مثال جذبي جو مظاهرو ڪيو ۽ دشمنن جي ناپاڪ منصوبن کي ناڪام بڻايو.
نگران وزيراعظم انوار الحق ڪاڪڙ پنهنجي پيغام ۾ چيو آهي ته ملڪي سلامتي ۽ ترقي خلاف ناپاڪ ارادن کي ناڪام بڻائڻ لاءِ قوم پنهنجي بهادر فوج سان گڏ بيٺل آهي.
سندس چوڻ هو ته پاڪستان انتها پسندي، دهشتگردي ۽ ٻاهرين جارحيت جهڙن سڪيورٽي چيلينجز کي منهن ڏئي رهيو آهي، هو محنت ۽ جستجو سان هر قسم جي سڪيورٽي ۽ معاشي چيلينج کان ملڪ جي حفاظت ڪندا.
انوار الحق ڪاڪڙ وڌيڪ چيو ته والاريل ڄمون ڪشمير جو تڪرار خطي جي امن ۽ سلامتي لاءِ سڀ کان وڏو چيلينج آهي، عالمي برادري کي اڳتي وڌي مسئلي جي حل لاءِ پنهنجو ڪردار ادا ڪرڻ گھرجي.
