سپريم ڪورٽ ملڪ ۾ عام چونڊون 8  فيبروري تي ئي يقيني بڻائڻ جو حڪم ڏئي  ڇڏيو

سپريم ڪورٽ ملڪ ۾ عام چونڊون 8  فيبروري تي ئي يقيني بڻائڻ جو حڪم ڏئي  ڇڏيو.

چيف جسٽس قاضي فائز عيسيٰ جي سربراهي ۾ سپريم ڪورٽ جي بئنچ  ملڪ ۾ 90 ڏينهن اندر عام چونڊن بابت درخواست تي ٻڌڻي ڪئي.

ٻڌڻي دوران اٽارني جنرل صدر عارف علوي ۽ اليڪشن ڪميشن ۾ ٿيل ڳالهين جا تفصيل عدالت ۾ پيش ڪيا ويا.

سپريم ڪورٽ حڪم نامو جاري ڪندي چيو ته 8 فيبروري تي عام چونڊون ڪرائڻ تي اتفاق ٿي ويو آهي، چونڊن جي تاريخ تي ڪنهن کي به اعتراض ناهي، سپريم ڪورٽ عام چونڊن جي تاريخ مقرر ڪرڻ ۾ ڪو به ڪردار ادا نه ڪيو آهي.

عدالت پنهنجي حڪم نامي ۾ چيو ته   صدر وٽ عام چونڊن جي تاريخ ڏيڻ جو اختيار هو جيڪو استعمال نه ڪيو ويو، اليڪشن ڪميشن ۽ صدر کي اهو ڪرڻ گهرجي جيڪو آئين چوي ٿو، آئين جي ڀڃڪڙي جا سنگين نتيجا نڪرندا آهن.

سپريم ڪورٽ پنهنجي حڪم نامي ۾ چيو ته   سپريم ڪورٽ صدر ۽ اليڪشن ڪميشن جي اختيارن ۾ مداخلت نه ٿي ڪري سگهي، سپريم ڪورٽ رڳو مددگار جي حيثيت سان صدر ۽ اليڪشن ڪميشن کي ڳالهين لاءِ چئي سگهي ٿي.

سپريم ڪورٽ چيو ته  سمورن آئيني ادارن کي مستقبل ۾ سمجهداري جو مظاهرو ڪرڻ گهرجي، چونڊن جي تاريخ بابت مونجهارا پيدا ڪندڙن خلاف ڪارروائي ڪئي ويندي.