عزم استحڪام جو ڪوبه سياسي مقصد ناهي : خواجه آصف

بچاءَ واري وزير خواجه آصف چيو آهي ته آپريشن عزم استحڪام جو ڪوبه سياسي مقصد ناهي، سياسي پارٽين جا خدشا ختم ڪيا ويندا، آپريشن عزم استحڪام انٽيليجنس بنيادن تي ٿيندو، تحريڪ انصاف جي خدشن کي ضرور ختم ڪيو ويندو، ڪي پي جي وڏي وزير ايپڪس ڪميٽيءَ جي اجلاس ۾ آپريشن جي مخالفت نه ڪئي،  دهشتگردن جي واپسي سان بدامني بابت خدشا درست ثابت ٿيا آهن، هنن جنرل باجوه ۽ جنرل فيض جي بريفنگ دوران دهشتگردن جي واپسي جي مخالفت ڪئي، دهشتگردن کي ڪنٽرول نه ڪيو ويو ته ٻين صوبن ۾ پکڙجي ويندا،  رياست جي سمورن ادارن کي آپريشن جي حمايت ڪرڻ گهرجي. ماڊل ٽائون ۾ پريس ڪانفرنس ڪندي خواجا آصف چيو ته آپريشن عزم استحڪام کي ضرب عضب ۽ ردالفساد سان ڀيٽ ڪئي پئي وڃي، گذريل آپريشنز جي نوعيت مختلف هئي پر مقصد ساڳيو آهي. سندس چوڻ هو ته ماضي ۾ به دهشتگرديءَ خلاف آپريشنز ٿيا، 2016ع ۾ اي پي ايس واقعو ٿيو، پوءِ نيشنل ايڪشن پلان ٺاهيو ويو، سموريون سياسي پارٽيون آن بورڊ هيون، سڀني نيشنل ايڪشن پلان جي حمايت ڪئي، آپريشن عزم استحڪام به نيشنل ايڪشن پلان جو تسلسل آهي. بچاءَ واري وزير خواجا آصف چيو ته ماضي ۽ اڄ جي صورتحال ۾ بنيادي فرق آهي، اڄ فاٽا کي ضم ڪيو ويو آهي، ماضي ۾ انهن علائقن تي دهشتگردن جو قبضو هو، سڄو علائقو ڏينهن رات نوگو ايريا ٿي ويو هو، صورتحال اڄڪلهه ائين نه آهي، اڄ سمورن علائقن تي رياست جي رٽ موجود آهي. هن چيو ته ڪجهه علائقن ۾ رات جي وقت دهشتگردن جي مداخلت آهي پر اهڙي ڪا ڳالهه ناهي ته سندن حدن ۾ دهشتگردن جي رٽ موجود هجي. بچاءَ واري وزير چيو ته نيشنل ايڪشن پلان تحت ايپڪس ڪميٽي جوڙي وئي آهي، ڪميٽي ۾ چئني وڏن وزيرن هن پلان جي مخالفت نه ڪئي، خيبرپختونخوا جي وڏي وزير اجلاس ۾ ڪنهن به قسم جي اختلاف راءِ جو اظهار نه ڪيو، علي امين گنڊاپور دٻيل لفظن ۾ چيو ته هن عمل جي حمايت ڪندا. خواجا آصف چيو ته هن معاملي تي ڪابينا ۽ پارليامينٽ ۾ بحث ڪيو ويندو، سوالن ۽ خدشن جا مناسب جواب ڏنا ويندا، جي يو آءِ ۽ پي ٽي آءِ جا خدشا ضرور ختم ڪيا ويندا پر جيترا ڏينهن بحث جي ضرورت هوندي قومي اسيمبلي ۽ سينيٽ ۾ ڪيو ويندو. بچاءَ واري وزير چيو ته هن آپريشن جي پويان ڪو به سياسي مقصد ناهي، هو رڳو دهشتگردي جو خاتمو چاهن ٿا، ميڊيا کي به گهرجي ته آپريشن جي حمايت ڪري، آپريشن عزم استحڪام خاص طور تي خيبرپختونخوا ۽ بلوچستان ۾ ٿيندو، هي ڪا سياسي جدوجهد ناهي، قومي سلامتي جي جدوجهد آهي. خواجا آصف چيو ته جن ضلعن ۾ آپريشن ٿيندو، اتي ٽن پارٽين جو ووٽ بئنڪ آهي، اهي پارٽيون پنهنجي ووٽ جي حفاظت لاءِ اسٽينڊ وٺي رهيون آهن، جوان روزانو جانيون ڏئي رهيا آهن، هي بدامني وڌي سگهي ٿي. بچاءَ واري وزير خواجا آصف چيو ته هن بدامني جي ملڪ کان ٻاهران به مدد ڪئي پئي وڃي، ڪجهه ماڻهو چاهن ٿا ته هي ملڪ دنيا لاءِ نوگو ايريا بڻجي وڃي، ڪجهه عنصر چاهن ٿا ته هتي ڪو به نه اچي.