اسرائيلي فورسز جا غزه ۾ رهائشي عمارتن ۽ اسپتالن تي حملا جاري آهي، گذريل 24 ڪلاڪن دوران 22 فلسطيني اسرائيلي فوج جي دهشتگردي جي ور چڙهي ويا.
عرب ميڊيا جو چوڻ آهي ته اسڪول تي حملي 13 ڄڻا شهيد ۽ 50 کان وڌيڪ زخمي ٿي پيا جڏهن ته جباليه ۾ 7 ۽ بيت الاهيه ۾ بمباري سبب هڪ فلسطيني جان وڃائي ويٺو.
عرب ميڊيا موجب، نصيرات پناهگير ڪيمپ ۾ بمباري سبب 2 ۽ رفح ۾ هڪ فلسطيني شهيد ٿي ويو.
عرب ميڊيا موجب، گذريل 24 ڪلاڪن دوران 22 فلسطيني شهيد ٿي ويا جڏهن ته 50 کان وڌيڪ زخمي ٿي پيا جن مان ڪيترن ئي جي حالت ڳڻتي جوڳي آهي.
آڪٽوبر 2023 کان اسرائيلي حملن ۾ شهيد فلسطينين جو انگ 44 هزار 249 تائين پهچي ويو آهي جڏهن ته هڪ لک 4 هزار 746 ماڻهو زخمي ٿي چڪا آهن.
ٻئي پاسي بيت الاهيه ۾ به اسرائيلي فوج ۽ فلسطينين ويڙهاڪن ۾ چڪريون جاري آهن.
