غزه ۾ اسرا ئيلي فوج جا حملا جاري آهن، جمعي جي صبح کان جاري ڪاررواين ۾ وڌيڪ 42 فلسطيني شهيد ۽ 133 زخمي ٿيا.
عرب ميڊيا موجب، اسرائيل جي نصيرات پناهگير ڪيمپ تي تازي حملي ۾ 24 فلسطيني جانيون وڃائي ويٺا جڏهن ته ڪمال عدوان اسپتال جي آءِ سي يو جو ڊائريڪٽر به شهيد ٿي ويو.
فلسطيني جي صحت واري وزارت موجب، غزه ۾ شهيدن جو انگ 44 هزازر 363 تائين پهچي ويو.
ٻئي پاسي حماس اولهه ڪناري ۾ اسرائيلي فوج جي بس کي نشانو بڻايو جنهن ۾ 9 اسرائيلي فوجي زخمي ٿيا جن مان 3 جي حالت ڳڻتي جوڳي ٻڌائي پئي وڃي.
هوڏانهن گڏيل قومن جي امدادي اداري (انروا) ٻي عالمي جنگ کانپوءِ غزه کي سڀ کان وڌيڪ بمباري سبب متاثر علائقو قرار ڏئي ڇڏيو.
گڏيل قومن خبردار ڪيو آهي ته غزه ڏڪار جي خطرو وڌي رهيو آهي، 20 لک کان وڌيڪ ماڻهو خوراڪ ۽ صاف پاڻي جي کوٽ جو شڪار آهن..
