سنڌ جي مڪاني ادارن واري وزير سيد ناصر حسين شاهه چيو آهي ته لياري پاڪستان پيپلز پارٽي جو مضبوط قلعو آهي، پارٽي چيئرمين بلاول ڀٽو زرداري جي هدايت ۽ سنڌ جي وڏي وزير سيد مراد علي شاهه جي رهنمائي هيٺ لياري ۾ هلندڙ ترقياتي منصوبن تي ڪم تيز ڪيو پيو وڃي.
صوبائي وزير سيد ناصر حسين شاهه ۽ ڪراچي جو ميئر بئريسٽر مرتضيٰ وهاب لياري سبزواري ٽرينگل پارڪ ۽ لياري گيٽ جو افتتاح ڪيو.
ان موقعي تي اڳوڻي ٽيسٽ ڪرڪيٽر يونس خان، هاڪي اولمپئن وسيم فيروز، پيپلز پارٽي اڳواڻ سينيٽر يوسف بلوچ، نبيل گبول، جاويد ناگوري، خليل هوت، ڪرم الله وقاصي، لياري ٽائون چيئرمين ناصر ڪريم بلوچ، ٽائون ميونسپل ڪمشنر لياري حماد خان، لياري ٽائون مان چونڊيل چيئرمينن ۽ وائيس چيئرمينن، ڪائونسلر ۽ عوام جو وڏو انگ موجود هو.
صوبائي وزير سيد ناصر حسين شاهه چيو ته هڳ لياري جي نيڪال ۽ پيئڻ جي پاڻي سميت ٻين مسئلن جي حل لاءِ ڀرپور صلاحيت سان ڪم ڪري رهيا آهن.
سندس چوڻ هو ته سبزواري ٽرينگل پارڪ ۽ وال آف لياري گيٽ لياري جي عوام لاءِ سندن چونڊيل حڪومت جو تحفو آهي.
صوبائي وزير ناصر شاهه چيو ته ٽائون ميونسپل ڪمشنر لياري حماد خان لوران جي سموري ٽيم کي مبارڪباد پيش ڪريان ٿو.
ڪراچي جي ميئر مرتضيٰ وهاب چيو ته لياري ۾ رڳو پيپلز پارٽي ڪم ڪيو آهي، سندن پارٽي ئي نوڪريون ڏئي ٿي.
هن چيو ته لياري ۾ انفراسٽرڪچر جي بهتري سميت روڊن جي تعمير، صفائي ۽ نيڪال جي نظام کي اپ گريڊ ڪيو پيو وڃي.
ڪراچيءَ جي ميئر مرتضيٰ وهاب چيو ته لياري ۾ راندين کي هٿي وٺرائڻ سندن ترجيحن ۾ شامل آهي اهو ئي ڪارڻ آهي جو لياري ۾ فٽبال، باڪسنگ، ڪراٽي ۽ ٻين راندين جي ميدانن کي آباد ڪرڻ لاءِ لڳاتار قدم کنيا پيا وڃن جنهن جو تازو مثال عالمي معيار جو ڪڪڙي گرائونڊ اسپورٽس ڪمپليڪس آهي. لياري ٽائون چيئرمين ناصر ڪريم بلوچ ۽ ٽائون ميونسپل ڪمشنر لياري حماد خان پڻ خطاب ڪيو.
