مديجي ڀرسان پراڻي تڪرار تان گهر تي حملو، فائرنگ سبب پيرسن ۽ نينگري قتل

مديجي ويجهو جعفري برادريءَ جي ٻن ڌرين ۾ تڪرار تان هٿياربندن گهر تي حملو ڪري پيرسن ۽ نينگريءَ کي گولين جو کاڄ بڻائي ڇڏيو، جڏهن ته هڪ عورت زخمي پڻ ٿي پئي آهي. هٿياربندن جي فائرنگ ۾ پيرسن محبوب جعفري ۽ 10 سالن جي نينگري فاطمه ڌيءُ غلام حيدر جعفري موقعي تي ئي مارجي ويا، هڪ عورت نوران زال غلام حيدر جعفري زخمي ٿي پئي. ڳوٺاڻن مارجي ويل نينگريءَ جو لاش ۽ زخمي عورت کي سکر اسپتال کڻائي ويا، پوليس پيرسن جو لاش کڻائي تعلقي اسپتال مديجي منتقل ڪري ڇڏيو. اسپتال مان پوسٽ مارٽم بعد لاش وارثن حوالي ڪيو ويو، مڙهه گهر پهچڻ تي ڪهرام مچي ويو. پوليس جو چوڻ آهي ته جعفري برادريءَ جي ٻن ڌرين ۾ پراڻي تڪرار تان واقعو پيش آيو آهي، جنهن ۾ پيرسن ۽ نينگري مارجي ويا آهن ۽ هڪ عورت زخمي ٿي پئي آهي، وڌيڪ جاچ ڪري رهيا آهيون.