نگران وزيراعظم انوارالحق ڪاڪڙ چيو آهي ته واپارين ۽ سيڙپڪارن جو اعتماد بحال ڪري معيشت مضبوط ڪئي ويندي.
اسلام آباد ۾ واپارين ۽ صنتعڪارن جي وفد سان ملاقات دوران ڳالهائيندي انوارالحق ڪاڪڙ چيو ته ڪاروباري برادريءَ جا مسئلا حل ڪرڻ حڪومت جي پهرين ترجيح آهي.
هن چيو ته هو ڪاروباري لڏي جي تجويزن کي ڀليڪار ڪري ٿو، عمل جوڳي تجويزن تي عمل ڪرايو ويندو.
نگران وزيراعظم چيو ته عهدو سنڀاليندي ئي ڪاروباري برادريءَ سان ملاقاتون ڪيون ۽ سندن مسئلا ٻڌا، حڪومت ٽيڪس نظام ۾ سڌارا يقيني بڻائي رهي آهي، ٽيڪس جو نظام ڊجيٽلائيز ڪيو پيو وڃي.
انوار الحق ڪاڪڙ چيو ته ٽيڪس اوڳاڙي ۾ اضافي تائين ملڪي معيشت بهتر نه ٿي سگهندي، سملگنگ روڪڻ لاءِ آپريشن شروع ڪيو ويو آهي، 48 ڪلاڪن دوران ڪريڪ ڊائون ڪيا ويا.
نگران وزيراعظم چيو ته ملڪي مسئلن جي حل لاءِ سمورن اسٽيڪ هولڊرن سان صلاح مشورا ضروري آهن.
هوڏانهن نگران وزيراعظم انوار الحق ڪاڪڙ سان نگران پرڏيهي وزير جليل عباس جيلاني ملاقات ڪئي، جنهن ۾ پرڏيهي وزارت جي معاملن تي ڳالهيون ڪيون ويون.
ذريعن موجب ملاقات دوران وزيراعظم جي تجويز ڪيل آمريڪي دوري بابت ڳالهه ٻولهه پڻ ڪئي وئي.
ذريعن موجب نگران وزيراعظم هلندڙ مهيني گڏيل قومن جي جنرل اسيمبلي ۾ شرڪت لاءِ آمريڪا روانو ٿيندو
