وڳڻ ڀرسان پلاٽ جي تڪرار تان مارجي ويل ٻن سئوٽن جا مڙهه مٽيءَ ماءُ حوالي ڪيا ويا آهن، پوليس مقتول زبير ۽ اسدالله پنهور جي قتل جو ڪيس پنج ڄڻن خلاف داخل ڪري ٻن جوابدارن کي گرفتار ڪري ورتو آهي.
ڳوٺ ياروديرو ۾ پنھور برادريءَ جي ٻن ڌرين وچ ۾ پلاٽ جي معاملي تان ٿيل جھيڙي دوران مارجي ويل ٻن سوٽن ڪامرس ڪاليج جي شاگرد زبير احمد پنھور ۽ درزي اسد الله پنھور جي جنازي نماز ڪرڻ بعد سندن مڙھ مقامي قبرستان ۾ مٽي ماءُ حوالي ڪيا ويا.
ٻنهي نوجوانن جي جنازي نماز ۾ مٽن مائٽن، ڳوٺاڻن ۽ علائقي واسين وڏي انگ ۾ شرڪت ڪئي.
مقتول زبير احمد پنھور جي پيءُ جي فرياد تي پنجن جوابدارن احمد رضا پنھور، زين پنھور، راجا پنھور، محمد صديق پنھور ۽ خليل پنھور خلاف وڳڻ ٿاڻي قتل جو ڪيس داخل ڪيو ويو آھي .
پوليس قتل ڪيس ۾ نامزد ٻن جوابدارن احمد رضا پنھور ۽ زين پنھور کي گرفتار ڪري ورتو آھي
