پيپلزپارٽي جي مرڪزي ڪميٽيءَ چونڊ نتيجن ۽ نئين حڪومتي سيٽ اپ بابت سياسي پارٽين سان ڳالهائڻ ۽ رابطن لاءِ ڪميٽي قائم ڪرڻ جو فيصلو ڪيو آهي، شيري رحمان جو چوڻ آهي ته اجلاس اڄ ٻيهر ٿيندو، جنهن ۾ قطعي فيصلو ڪيو ويندو.
اسلام آباد ۾ اڳوڻي صدر آصف علي زرداري ۽ پ پ چيئرمين بلاول ڀٽو زرداري جي صدارت هيٺ پيپلزپارٽي جي سي اي سي جو اجلاس ٿيو.
ذريعن موجب اجلاس ۾ ميمبرن جي اڪثريت ن ليگ بدران پي ٽي آءِ سان گڏ ويهڻ جي تجويز ڏني.
ميمبرن پ پ قيادت کي تجويز ڏني ته آزاد اميدوارن جي مينڊيٽ جو احترام ڪندي کين اپوزيشن ۾ ويهڻ گهرجي، ظاهري طور مضبوط اتحادي حڪومت ٺهندي نظر نه پئي اچي.
اجلاس بعد ميڊيا کي بريفنگ ڏيندي پ پ اڳواڻ شيري رحمان چيو ته اجلاس اڄ ٻيهر ٿيندو، سياسي پارٽين سان رابطا ڪرڻ جو فيصلو ڪيو آهي.
شازيا مري چيو ته اجلاس ۾ چئني صوبن جي ميمبرن پنهنجا خدشا ظاهر ڪيا آهن.
فيصل ڪريم ڪنڊي جو چوڻ هو ته اليڪشن بابت چئني صوبن ۾ خدشا آهن، اڄوڪي سي اي سي جي اجلاس ۾ قطعي فيصلا ڪيا ويندا.
هن چيو ته اجلاس بعد ميڊيا کي تفصيلي بريفنگ ڏني ويندي ۽ سياسي پارٽين سان رابطن لاءِ ڪميٽي ميمبرن جا نالا پڻ ٻڌايا ويندا.
