اسلامو فوبيا انسانيت، ڀائيچاري ۽ همدردي جي اصولن کي ڪمزور ڪندي آهي: بلاول ڀٽو زرداري

پ پ چيئرمين بلاول ڀٽو زرداري چيو آهي ته اسلامو فوبيا انسانيت، ڀائيچاري ۽ همدردي جي اصولن کي ڪمزور ڪندي آهي، ضروري آهي ته اسلامو فوبيا جو مقابلو ڪيو وڃي. اسلامو فوبيا جي عالمي ڏهاڙي تي جاري ڪيل بيان ۾ بلاول ڀٽو زرداري چيو ته نائن اليون کانپوءِ  مسلمانن ۽ اسلام بابت دشمني توڙي شڪ شبهن ۾ اضافو ٿيو. هن چيو ته اهڙي معاشري لاءِ ڪوشش ڪرڻ گهرجي جتي ماڻهو بنا فرق آباد ٿي سگهن، اسلام امن جو مذهب آهي، جيڪو ماڻهن سان عزت ۽ احترام سان پيش اچڻ توڙي صبر جي تعليم ڏي ٿو. بلاول ڀٽو زرداري چيو ته حقيقتن کان ابتڙ اسلام ۽ مسلمانن کي مسلسل ۽ غير  منصفاڻي طور دهشتگردي سان ڳنڍيو ويندو آهي. پ پ چيئرمين چيو ته اچو ته اهڙي دنيا بڻائڻ لاءِ ڪم ڪريون جتي  اسلامو فوبيا جو خاتمو ٿئي  ۽ هر  فرد وقار، تحفظ ۽ آزاديءَ سان رهي سگهي