الزام طالبان حڪومت کي پنهنجي ذميوارين کان آزاد نٿا ڪري سگهن: پرڏيهي ترجمان

پاڪستان، افغان پرڏيهي وزير جا بي بنياد الزام رد ڪري ڇڏيا، پرڏيهي آفيس جي ترجمان شفقت علي خان جو چوڻ آهي ته الزام طالبان حڪومت کي پنهنجي ذميوارين کان آزاد نٿا ڪري سگهن، افغان ڌرتي تي سرگرم دهشتگرد عنصرن جي موجودگي گڏيل قومن جي رپورٽن ۾ به واضح آهي. اسلام آباد ۾ هفتيواري بريفنگ ڏيندي شفقت علي خان چيو ته پاڪستان ڪيترائي ڀيرا افغانستان ۾ فتنه الخوارج جي موجودگي جا اطلاع ڏنا آهن، پاڪستان 11 کان 15 آڪٽوبر تائين سرحد تي طالبان جي چڙڏياريندڙ حملن تي ڳڻتي جو اظهار ڪيو. سندس چوڻ هو ته پاڪستان پنهنجي دفاع جي حق تحت طالبان جي حملن جو هاڪاري طور ناڪام بڻايو، طالبان فورسز ۽ ان جي استعمال هيٺ دهشتگردن جي ٿاڪن کي نقصان پهچايو ويو. پرڏيهي آفيس جي ترجمان چيو ته پاڪستان واضح ڪيو ته جوابي ڪارروائي شهري آبادي نه دهشتگرد عنصرن خلاف هئي، طالبان جي درخواست تي 15 آڪٽوبر جي شام 6 وڳي کان 48 ڪلاڪن جي جنگبندي ڪئي وئي. شفقت علي خان چيو ته ٻئي ملڪ مسئلي جي پرامن حل لاءِ تعميري ڳالهين ۾ رڌل آهن، پاڪستان هڪ پرامن، مستحڪم ۽ خوشحال افغانستان جو خواهشمند آهي. هن چيو ته طالبان حڪومت پنهنجون ذميواريون نڀائيندي علاقائي امن لاءِ هاڪاري ڪردار ادا ڪري، پاڪستان کي اميد آهي ته افغان عوام هڪ ڏينهن نمائنده ۽ جامع حڪومت تحت آزاداڻي زندگي گذاريندو………