ام رباب چانڊيو جي ٽن گھرڀاتين جي قتل ڪيس جي ٻڌڻي 8 نومبر تائين ملتوي

دادو جي عدالت ام رباب چانڊيو جي ٽن گھرڀاتين جي قتل ڪيس ۾ ڊجيٽل انويسٽيگيشن اسيل انچارج جي پيش نه ٿيڻ سبب ٻڌڻي 8 نومبر تائين ملتوي ڪري ڇڏي. ماڊل ڪرمنل ٽرائل ڪورٽ جي جج حسن علي ڪلوڙ جي عدالت ۾ ام رباب چانڊيو جي ڏاڏي ڪرم الله چانڊيو، والد مختيار چانڊيو ۽ چاچي قابل چانڊيو جي قتل ڪيس جي ٻڌڻي ٿي. ٻڌڻي دوران ام رباب چانڊيو، فريادي پرويز چانڊيو سان گڏ عدالت ۾ پيش ٿي. الزام هيٺ آيل پ پ ايم پي اي سردار احمد چانڊيو، ايم پي اي برهان خان چانڊيو، ان وقت جو ايس ايڇ او ڪريم چانڊيو ۽ ستار چانڊيو عدالت ۾ پيش ٿيا. ڪيس ۾ گرفتار جوابدار علي گوھر چانڊيو، مرتضيٰ، سڪندر ۽ ذوالفقار چانڊيو کي جيل پوليس عدالت ۾ پيش ڪيو. ڊجيٽل انويسٽيگيشن سيل انچارج عاصم حسين موڪل تي هئڻ سبب پيش نه ٿي سگهيو، کيس اڄ بيان رڪارڊ ڪرائڻو هو. عدالت ڊجيٽل انويسٽيگيشن سيل انچارج جي پيش نه ٿيڻ سبب ٻڌڻي 8 نومبر تائين ملتوي ڪري ڇڏي. عدالت ٻاهران ميڊيا سان ڳالهائيندي ام رباب چانڊيو چيو ته ڪيس تيزي سان هلي رهيو آهي، اميد آهي ته جلد فيصلو ايندو، عدالتن مان انصاف جي اميد آهي. ام رباب چانڊيو جو چوڻ هو ته ڪيس ۾ گرفتار جوابدار سڪندر چانڊيو کي ويجهي مائٽ جي لاڏاڻي جو سبب ڄاڻائي گهرو کاتي پيرول تي آزاد ڪيو آهي، جنهن مان صاف ظاهر آهي ته کين وڌيڪ هيسايو پيو وڃي.