برساتي ٻوڏ سبب 30 ارب ڊالرن جو نقصان ٿيو، سنڌ سڀ کان وڌيڪ متاثر ٿي آهي :وزيراعظم

وزيراعظم شهباز شريف چيو آهي ته برساتي ٻوڏ سبب 30 ارب ڊالرن جو نقصان ٿيو، سنڌ سڀ کان وڌيڪ متاثر ٿي آهي، برساتي ٻوڏ سبب ٿيل نقصان جو ازالو ڪيترن ئي سالن تائين نه ٿي سگهندو،  صوبن ۽ وفاقي حڪومت جي گڏيل ڪوششن سان متاثرن جي مدد ڪئي،  حڪومت اين ڊي ايم اي جا مسئلا فوري طور حل ڪندي، اين ڊي ايم اي جو صوبن سان ويجهو رابطو هئڻ گهرجي. اسلام آباد ۾ اين ڊي ايم اي جي پراجيڪٽ نيشنل ايمرجنسيز آپريشن سينٽر جي تقريب کي خطاب ڪندي شهباز شريف چيو ته ماضي ۾ پاڪستان ڪيترن ئي ٻوڏن کي منهن ڏئي چڪو آهي، موجوده بجيٽ ۾ وفاقي حڪومت ٻوڏ متاثرن لاءِ هڪ سئو ارب رپيا رکيا آهن. سندس چوڻ هو ته خٻوڏ سبب پاڪستان تمام گهڻي تباهي آئي آهي، اين ڊي ايم اي ٻوڏ متاثرن جي بحالي ۾ اهم ڪردار ادا ڪيو، اين ڊي ايم اي ۾ ماڻهو ٻين ادارن مان ڊيپوٽيشن تي ايندا آهن، چيئرمين اين ڊي ايم اي موسمياتي تبديلين جي چئلينجن کي منهن ڏيڻ لاءِ قدم کنيا. وزيراعظم شهباز شريف چيو ته اين ڊي ايم اي ٻين ادارن سان گڏجي حڪمت عملي ٺاهي ۽ اهم ڪم ڪيو، جنيوا ۾ ٻوڏ جي تباهي جي حوالي سان ڊونر ڪانفرنس ٿي هئي، هنن ڪانفرنس ۾ به ٻوڏ متاثرن لاءِ آواز اٿاريو آهي ته 2022ع جي ٻوڏ سبب پاڪستان کي هن وقت تائين 30 ارب ڊالرن جو نقصان ٿيو آهي، ٻوڏ متاثرن جي امداد لاءِ قدم کنيا وڃن. هن چيو ته صوبن ۽ وفاق جي گڏيل ڪوششن سان متاثرين جي بحالي کي يقيني بڻايو،اين ڊي ايم اي جو موسمياتي تبديليءَ بابت ڄاڻ وارو نظام ساراهه جوڳو آهي، اين ڊي ايم اي پاران تيار ڪيل نظام ٻين شعبن لاءِ پڻ رول ماڊل آهي. وزيراعظم چيو ته حڪومت اين ڊي ايم اي کي هر ممڪن وسيلا فراهم ڪندي، ڪنهن به سفارش کي قبول نه ڪيو، ميرٽ کي تسليم ڪيو وڃي، بهترين افرادي قوت کي استعمال ۾ آڻڻ لاءِ تربيت تي خاص ڌيان ڏنو وڃي، اين ڊي ايم اي جو چئني صوبن سان ويجهو رابطو هئڻ گهرجي. شهباز شريف چيو ته جيڪي صوبا موسمياتي تبديليءَ کان وڌيڪ متاثر ٿي سگهن ٿا انهن سان جامع رابطي جو نظام هجڻ گهرجي. وزيراعظم چيو ته انفارميشن ٽيڪنالاجي لاءِ 80 ارب رپيا رکيا آهن، ڪروڙين ڇوڪرن ۽ ڇوڪرين کي آئي ٽي هنر سيکارڻا آهن، چيني ڪمپني هر سال 3 لک ٻارن کي آءِ ٽي هنر فراهم ڪندي، ڪروڙين نوجوانن کي باوقار روزگار ڏيارڻو آهي. شهباز شريف چيو ته پاڪستان موسمياتي تبديلين جي حوالي سان ريڊ زون ۾ اچي چڪو آهي، پاڪستان کي موسمياتي تبديليءَ کان متاثر ٿيندڙ 10 ملڪن ۾ شامل ٿي ويو آهي، کين حوصلو ناهي هارائڻو محنت ڪرڻي آهي.