بشڪيڪ ۾ پرڏيهي وزير اسحاق ڊار جي ڪرغز هم منصب سان ملاقات، ٻه طرفي لاڳاپن ۽ رابطن کي وڌيڪ مضبوط بڻائڻ جو عزم

بشڪيڪ ۾ پرڏيهي وزير اسحاق ڊار پنهنجي ڪرغز هم منصب سان ملاقات ڪئي، جنهن دوران ٻطرفي لاڳاپن ۽ رابطن کي وڌيڪ مضبوط بڻائڻ جي عزم کي ورجايو ويو. نائب وزيراعظم ۽ پرڏيهي وزير اسحاق ڊار ڪرغز پرڏيهي وزير سان ملاقات دوران ڪرغزستان ۾ پاڪستانين سميت پرڏيهين تي تشدد جي هاڻوڪي افسوسناڪ واقعن بابت خيالن جي ڏي وٺ ڪئي. پرڏيهي وزير اسحاق ڊار ڪرغز حڪومت طرفان بدامني دوران حالتون معمول تي آڻڻ ۽ پاڪستاني شاگردن جي تحفظ ۽ ڀلائي کي يقيني بڻائڻ لاءِ فوري قدم کڻڻ تي ٿورا مڃيا. ان موقعي تي پرڏيهي وزير اسحاق ڊار چيو ته اميد آهي ته پاڪستانين تي تشدد جي ڪاررواين جي ذميوارن جو احتساب ڪيو ويندو. پرڏيهي وزير ڪرغزستان ۾ رهندڙ پاڪستانين سميت سمورن پرڏيهين کي سيڪيورٽي فراهم ڪرڻ لاءِ پنهنجي حڪومت جي عزم کي ورجايو. ڪرغزستان جي پرڏيهي وزير امن امان جي بحالي لاءِ ڪرغز اختيارين پاران کنيل قدمن جي وضاحت ڪئي ۽ وڳوڙن جي ذميوارن کي گرفتار ڪرڻ، ڪيس هلائڻ ۽ سزا ڏيڻ جي عزم کي ورجايو.