بلوچستان جي وڏي وزير مير عبدالقدوس بزنجو صوبائي اسيمبلي ٽوڙڻ جي ايڊوائيس تي صحي ڪري ڇڏي، وڏي وزير طرفان صحي ڪرڻ بعد ايڊوائيس اڄ منظوري لاءِ گورنر بلوچستان کي اماڻي ويندي.
بلوچستان اسيمبلي اڄ ٽوڙي ويندي، اسيمبلي جو مدو رات ٻارهين وڳي پورو ٿيندو.
بلوچستان جي وڏي وزير مير عبدالقدوس بزنجو صوبائي اسيمبلي ٽوڙڻ جي ايڊوائيس تي صحي ڪري ڇڏي.
وڏي وزير طرفان صحي ڪرڻ بعد ايڊوائيس اڄ منظوري لاءِ گورنر بلوچستان کي اماڻي ويندي.
بلوچستان ۾ نگران وڏي وزير جو نالو فائنل نه ٿي سگھيو آهي.
اسلام آباد ۾ نگران وڏي وزير لاءِ سردار اختر مينگل ۽ مولانا فضل الرحمان وچ ۾ ملاقات جو هڪ رائونڊ مڪمل ٿي ويو، مخالف ڌر جي پارٽين جي يو آءِ ۽ بي اين پي مينگل پنهنجن اميدوارن جا نالا پيش ڪري ڇڏيا.
وڏو وزير عبدالقدوس بزنجو به اسلام آباد ۾ موجود آهي، نگران وڏي وزير لاءِ رابطن ۾ تيزي اچي وئي آهي.
ذريعن موجب مخالف ڌر متفقه اميدوار آڻڻ تي راضي ٿي وئي آهي.
ذريعن جو چوڻ آهي ته هن وقت نگران وڏي وزير لاءِ جعميت علماءَ اسلام ف طرفان اڳوڻي قومي اسيمبلي ميمبر عثمان باديني، بي اين پي پاران صوبائي اسيمبلي ميمبر حمل ڪلمتي ۽ پ پ طرفان علي حسن زهري جا نالا ڏنا ويا آهن.
ذريعن موجب، اڳوڻي بيورو ڪريٽ شبير مينگل جو نالو به غور هيٺ آهي، نگران وڏي وزير جو نالو فائنل ٿيڻ بعد 14 رڪني صوبائي ڪابينا جوڙي ويندي.
